Британиянинг “SandStone Global” компанияси “ Treasures of Uzbekistan” фильмини суратга олмоқда

Британиянинг “SandStone Global” компанияси Туризм қўмитаси билан ҳамкорликда “Treasures of Uzbekistan” (“Ўзбекистон хазиналари”) лойиҳасини суратга олишни бошлади. 

Лойиҳанинг суратга олиш ишлари машҳур телебошловчи, шунингдек, қадимги тарих билан шуғулланувчи инглиз тарихшунос ва ёзувчиси Беттани Ҳюз  раҳбарлигида олиб борилади.

Суратга олиш гуруҳи саргузаштларга бой саёҳатга чиқиб, маҳаллий аҳоли ва мутахассислар билан мустаҳкам алоқалар ўрнатади, Ўзбекистоннинг ноёб жаҳон меросини намойиш этади, ҳамда томошабинларни юртимизнинг тарихий ва маданий диққатга сазовор жойлари билан таништиради.

Маълумот учун: “Дунё хазиналари” жаҳонга машҳур ҳужжатли сериал бўлиб, 120 дан ортиқ мамлакатда томошабинларни ўзига жалб қилган ва 450 миллионга яқин томошабин тўплаган. Фильмлар миллий ва халқаро оммавий ахборот воситаларида кенг қизиқиш уйғотмоқда ва ижтимоий тармоқларда ўзининг содиқ мухлисларига эга. 2023-йилда “Хазиналар” фильмларининг дунё миқёсидаги аудиторияси 3,9 миллиард кишини ташкил этди.