Чотқолда ноёб кийик тури — элик кўпаймоқда

Экология, атроф-муҳитни муҳофаза қилиш ва иқлим ўзгариши  вазирлиги тасарруфидаги Чотқол давлат биосфера қўриқхонасида ўрнатилган фотоқопқонга элик кийиклари муҳрланди.

Эликлар Европа ва Осиёда тарқалган. Ёзда ўтлоқлар ва тоғ ён бағирларида яшайди. Қишда тоғдан водийларга тушади. Кўпинча 2 та, баъзан 3 та болалайди. Дарахт барги ва новдалари, резаворлар, лишайниклар билан озиқланади. Урғочисининг узунлиги 140 см гача, бўйи 90 см гача, оғирлиги 55 кг гача боради. Эркаклари эса кичикроқ, думи калта, 3, баъзан 4 қисқа бутоқли кичик шохи бор. 

Кийикларнинг бу тури қўриқхонада қарийб 15 йил давомида кўринмай кетганди. Яқин 4 йилда яна пайдо бўлди ва кўпайтирилмоқда. Айни дамда ҳудудда эликлар сони 7 тани ташкил қилади.

Маълумот учун, Чотқол давлат биосфера қўриқхонаси 1947 йил декабрь ойида ташкил этилган. Ҳудудда ҳайвонот оламининг 1300 га яқин умуртқали ҳамда умуртқасиз турлари учрайди. Сут эмизувчилардан тоғ эчкиси, элик, оқ тирноқли Тян-Шан айиғи, кўк (Мензбир) суғури, силовсин, бўри, қор қоплони ҳамда бир қанча ҳайвон турларини учратиш мумкин. Буларнинг 20 тури Ўзбекистон Республикаси Қизил китобига, 2 тури — қор қоплони ва Мензбир суғури Халқаро Қизил рўйхатга киритилган.