Chotqolda noyob kiyik turi — elik koʻpaymoqda

Ekologiya, atrof-muhitni muhofaza qilish va iqlim oʻzgarishi  vazirligi tasarrufidagi Chotqol davlat biosfera qoʻriqxonasida oʻrnatilgan fotoqopqonga elik kiyiklari muhrlandi.

Eliklar Yevropa va Osiyoda tarqalgan. Yozda oʻtloqlar va togʻ yon bagʻirlarida yashaydi. Qishda togʻdan vodiylarga tushadi. Koʻpincha 2 ta, baʼzan 3 ta bolalaydi. Daraxt bargi va novdalari, rezavorlar, lishayniklar bilan oziqlanadi. Urgʻochisining uzunligi 140 sm gacha, boʻyi 90 sm gacha, ogʻirligi 55 kg gacha boradi. Erkaklari esa kichikroq, dumi kalta, 3, baʼzan 4 qisqa butoqli kichik shoxi bor. 

Kiyiklarning bu turi qoʻriqxonada qariyb 15 yil davomida koʻrinmay ketgandi. Yaqin 4 yilda yana paydo boʻldi va koʻpaytirilmoqda. Ayni damda hududda eliklar soni 7 tani tashkil qiladi.

Maʼlumot uchun, Chotqol davlat biosfera qoʻriqxonasi 1947 yil dekabr oyida tashkil etilgan. Hududda hayvonot olamining 1300 ga yaqin umurtqali hamda umurtqasiz turlari uchraydi. Sut emizuvchilardan togʻ echkisi, elik, oq tirnoqli Tyan-Shan ayigʻi, koʻk (Menzbir) sugʻuri, silovsin, boʻri, qor qoploni hamda bir qancha hayvon turlarini uchratish mumkin. Bularning 20 turi Oʻzbekiston Respublikasi Qizil kitobiga, 2 turi — qor qoploni va Menzbir sugʻuri Xalqaro Qizil roʻyxatga kiritilgan.