Дунёда вабо касаллиги авж олмоқда — ЖССТ

ЖССТ ҳисоботига кўра, ўтган йилда 33 мамлакатда яшовчи 805 мингга яқин кишига ушбу касаллик ташхиси қўйилган. Бу 2023 йилдагига нисбатан қарийб 100 мингтага, 2022 йилга қиёслаганда эса 340 мингтага кўп дегани.  Беморлардан 5 минг 800 нафардан зиёди эпидемия туфайли ҳаётдан кўз юмган. . 

Юқори ўсиш динамикаси асосан Шарқий Ўрта ер денгизи минтақасида қайд этилган. Жумладан, Яман бу борада етакчилик қилган. Мамлакатда ўтган йили 260 мингдан ортиқ янги касалланиш ҳолатлари рўйхатга олинган. 

Шунингдек, Африка давлатларида ҳам эпидемия тарқалиши авж олган. Суданда 51 минг, Конго Демократик Республикасида 31 минг, Эфиопияда 27 минг ва Нигерияда 24 мингдан ортиқ кишида вабо аниқланган. 

Экспертлар хулосасига кўра, бу касалликни жиловлаш мумкин. Бироқ фармацевтика компаниялари паст рентабеллик туфайли вабога қарши вакциналар ишлаб чиқаришни деярли тўхтатиб қўйган. 

Чунки аксарият вабо ўчоқлари энг қашшоқ мамлакатларда аниқланяпти. Табиийки, улар бундай ҳимоя воситаларини катта миқдорда харид қилишга қодир эмас.

Қолаверса, тоза ичимлик суви таъминоти, санитария ва гигиена қоидаларига амал қилиш вабо эпидемиясини тўхтатишнинг ягона ечими бўлиб қолмоқда.