Қозоғистон Россияга бензин экспорт қилишдан воз кечди

Бу ҳақда Reuters манбасига таяниб хабар берилди.

Маълумотларга кўра, Қозоғистон Энергетика вазирлиги июль ойида мамлакатнинг иккинчи йирик нефтни қайта ишлаш корхонаси — Павлодар нефт-кимё заводига Россияга 17,5 минг тонна АИ-92 бензини экспорт қилиш учун рухсат берган.

Август ойида эса шунга ўхшаш квота Атирау нефтни қайта ишлаш заводига ҳам ажратилган.

Бироқ соҳадаги манбаларга кўра, ёқилғи эгалари Россияга бензин экспорт қилишни режалаштирмаяпти. Бунга Россия банклари орқали тўловларни амалга оширишдаги қийинчиликлар ва Ғарб санкцияларига тушиб қолиш хавфи сабаб бўлаётгани айтилмоқда.

Қозоғистоннинг ўзида ҳам ёқилғи танқислиги кузатилмоқда

Манбаларнинг таъкидлашича, ҳозир Қозоғистон ички бозорида ҳам автомобиль ёқилғиси тақчиллиги кузатилмоқда. Бунга ёзги мавсумда талабнинг юқорилиги ва минтақадаги ёқилғи таъминоти билан боғлиқ муаммолар сабаб бўлмоқда.

Қозоғистон ҳукумати ички бозорни ҳимоя қилиш мақсадида нефть маҳсулотлари экспортига вақтинчалик чекловлар жорий қилган. Амалдаги тартибга кўра, автомобиль транспортида бензин ва дизель ёқилғисини экспорт қилишга 2026 йил 21 ноябргача чеклов ўрнатилган. 

Шунингдек, айрим нефть маҳсулотларини Евроосиё иқтисодий иттифоқи божхона ҳудудидан ташқарига олиб чиқишга 2026 йил 31 декабргача тақиқ белгиланган. Қозоғистон Энергетика вазирлиги бу чоралар ички бозор барқарорлиги ва мамлакат энергетик хавфсизлигини таъминлашга қаратилганини билдирган. 

Санкциялар Россияга ёқилғи етказиб беришни қийинлаштирмоқда

Россияда ҳам ёқилғи бозорида босим кучайган. Reuters маълумотига кўра, мамлакат ҳукумати ички бозордаги тақчиллик сабаб дизель ёқилғиси экспортига қўйилган чекловларни сентябрь ойигача узайтиришни кўриб чиқмоқда. 

Қозоғистон нефтни қайта ишлаш заводларининг Россияга ажратилган бензин квоталаридан фойдаланмаслиги минтақадаги ёқилғи бозори, тўлов тизимлари ва санкция хавфининг ташқи савдога таъсири кучайиб бораётганини кўрсатади.