АҚШ ва Россия Қозоғистондаги космодромдан космик кема учирди

14 июль куни Россияга ижарага берилган Қозоғистондаги Байқўнғир космодромидан учирилган АҚШ ва Россия астронавтларидан иборат экипаж Халқаро космик станцияга муваффақиятли етиб борди.

NASA астронавти Анил Менон ҳамда россиялик космонавтлар Пётр Дубров ва Анна Кикина режа асосида маҳаллий вақт билан соат 19:47 да Роскосмоснинг “Союз МС-29” кемасида парвоз қилди.

Улар Халқаро космик станцияда саккиз ой изланиш олиб боради. Космик кема учирилганидан тахминан уч соат ўтиб автоматик режимда станцияга муваффақиятли уланган.

Мазкур миссия Анил Менон учун илк космик парвоз, Пётр Дубров ва Анна Кикина учун эса иккинчи парвоз ҳисобланади.

Учлик Халқаро космик станцияда NASA астронавтлари Жессика Мейр, Жек Хетуэй ва Крис Уилямс, Европа космик агентлиги астронавти Софи Адено ҳамда Роскосмос космонавтлари Сергей Куд-Сверчков, Сергей Микаев ва Андрей Федяевга қўшилади.

Айзекман Россия расмийлари билан учрашди

NASA раҳбари Жаред Айзекман учириш маросимида қатнашди. Бу NASA раҳбарининг сўнгги саккиз йил ичида Байқўнғирга қилган илк ташрифидир.

Ташриф Украинадаги уруш туфайли Москва ва Вашингтон ўртасида кескинлик сақланиб қолаётганига қарамай, орбитадаги ҳамкорлик давом этаётганидан нишона.

Парвоздан олдин Айзекман “Роскосмос” давлат корпорацияси раҳбари Дмитрий Баканов ва Россия бош вазири ўринбосари Денис Мантуров билан учрашди.

Томонлар Халқаро космик станция ва бошқа лойиҳалар бўйича истиқболдаги ҳамкорликни муҳокама қилган.

Сиёсий зиддиятлар фонидаги космик ҳамкорлик

Совуқ уруш даврида космик пойгада ашаддий рақибга айланган АҚШ ва Россия бугунги кунда Халқаро космик станция ва бошқа лойиҳалар доирасида бир ёқадан бош чиқармоқда.

2022 йилда Россия Украинага бостириб кирганидан сўнг сиёсий таранглик юзага келди. Шунга қарамай, Вашингтон ва Москва ҳамкорликни сақлаб қолди.

АҚШ ва Россия экипажлари ҳар икки давлатнинг космик кемаларида навбатма-навбат Халқаро космик станцияга парвоз қилмоқда.

Бироқ янада кенгроқ ҳамкорлик режалари, жумладан NASAнинг Ой тадқиқотларига қаратилган “Artemis” дастуридаги Россия иштироки амалга ошмади.

Аксинча, Роскосмос Хитой билан келажакдаги Ой миссияси бўйича ҳамкорликни бошлаб юборган.