AQSH va Rossiya Qozog‘istondagi kosmodromdan kosmik kema uchirdi

14-iyul kuni Rossiyaga ijaraga berilgan Qozog‘istondagi Bayqo‘ng‘ir kosmodromidan uchirilgan AQSH va Rossiya astronavtlaridan iborat ekipaj Xalqaro kosmik stansiyaga muvaffaqiyatli yetib bordi.

NASA astronavti Anil Menon hamda rossiyalik kosmonavtlar Pyotr Dubrov va Anna Kikina reja asosida mahalliy vaqt bilan soat 19:47 da Roskosmosning “Soyuz MS-29” kemasida parvoz qildi.

Ular Xalqaro kosmik stansiyada sakkiz oy izlanish olib boradi. Kosmik kema uchirilganidan taxminan uch soat o‘tib avtomatik rejimda stansiyaga muvaffaqiyatli ulangan.

Mazkur missiya Anil Menon uchun ilk kosmik parvoz, Pyotr Dubrov va Anna Kikina uchun esa ikkinchi parvoz hisoblanadi.

Uchlik Xalqaro kosmik stansiyada NASA astronavtlari Jessika Meyr, Jek Xetuey va Kris Uilyams, Yevropa kosmik agentligi astronavti Sofi Adeno hamda Roskosmos kosmonavtlari Sergey Kud-Sverchkov, Sergey Mikayev va Andrey Fedyayevga qo‘shiladi.

Ayzekman Rossiya rasmiylari bilan uchrashdi

NASA rahbari Jared Ayzekman uchirish marosimida qatnashdi. Bu NASA rahbarining so‘nggi sakkiz yil ichida Bayqo‘ng‘irga qilgan ilk tashrifidir.

Tashrif Ukrainadagi urush tufayli Moskva va Vashington o‘rtasida keskinlik saqlanib qolayotganiga qaramay, orbitadagi hamkorlik davom etayotganidan nishona.

Parvozdan oldin Ayzekman “Roskosmos” davlat korporatsiyasi rahbari Dmitriy Bakanov va Rossiya bosh vaziri o‘rinbosari Denis Manturov bilan uchrashdi.

Tomonlar Xalqaro kosmik stansiya va boshqa loyihalar bo‘yicha istiqboldagi hamkorlikni muhokama qilgan.

Siyosiy ziddiyatlar fonidagi kosmik hamkorlik

Sovuq urush davrida kosmik poygada ashaddiy raqibga aylangan AQSH va Rossiya bugungi kunda Xalqaro kosmik stansiya va boshqa loyihalar doirasida bir yoqadan bosh chiqarmoqda.

2022-yilda Rossiya Ukrainaga bostirib kirganidan so‘ng siyosiy taranglik yuzaga keldi. Shunga qaramay, Vashington va Moskva hamkorlikni saqlab qoldi.

AQSH va Rossiya ekipajlari har ikki davlatning kosmik kemalarida navbatma-navbat Xalqaro kosmik stansiyaga parvoz qilmoqda.

Biroq yanada kengroq hamkorlik rejalari, jumladan NASAning Oy tadqiqotlariga qaratilgan “Artemis” dasturidagi Rossiya ishtiroki amalga oshmadi.

Aksincha, Roskosmos Xitoy bilan kelajakdagi Oy missiyasi bo‘yicha hamkorlikni boshlab yuborgan.