Шифокорлар сунъий интеллект ёрдамида йилига 132 соат вақт тежамоқда – тадқиқот

Philips компаниясининг “Future Health Index” тадқиқоти 10 та мамлакатда икки босқичли сўровнома шаклида ўтказилди: улардан бирида 2011 нафар тиббиёт ходими, иккинчисида эса 20 085 нафар бемор иштирок этди.

Соғлиқни сақлаш ходимлари сунъий интеллектдан асосан ишга доир фикрларни муҳокама қилиш учун “ҳамкор” сифатида, клиник қайдларни матнга ўгириш ёки беморлар қабулини режалаштириш каби вазифаларда фойдаланишади.

Клиник нуқтаи назардан, сунъий интеллект хавфли дори-дармонлар бирикмасидан огоҳлантириши, аломатларга асосланиб ташхис таклиф қилиши, рентген ва бошқа сканерлаш таҳлилларига ёрдам бериши мумкин.

Сўровда қатнашган мутахассисларнинг 46 фоизи йилига ўртача 132 соат вақт тежаётганини, 50 фоизи эса сунъий интеллект беморларни қабул қилиш имкониятини оширганини билдирди.

Ҳамширалар ва шифокорларнинг таъкидлашича, сунъий интеллект уларга аниқроқ ва эҳтиёткорроқ бўлишга ҳамда ҳолатларни батафсил таҳлил қилишга ёрдам берган.

Бироқ сунъий интеллектдан фойдаланиш суръати ташкилотлар томонидан уни расмий жорий этишдан ўзиб кетди: шифокорларнинг 64 фоизи иш жойидаги воситалар эҳтиёжларини қондирмаса, ўзларининг шахсий СИ воситаларига мурожаат қилмоқда.

Соғлиқни сақлаш соҳаси мутахассисларининг 70 фоизи фаолият юритувчи ишхонасида сунъий интеллектга асосланган воситалар бўйича тренинглар йўқлигини, чекланганлигини ёки изчил эмаслигини айтган.

Мутахассисларнинг 90 фоизи сунъий интеллект ривожланган сари жараёнда инсон иштирокини сақлаб қолиш муҳимлигини таъкидлаган; 86 фоизи эса сунъий интеллектнинг барча натижалари инсон назоратини талаб қилишини айтган.