Shifokorlar sun’iy intellekt yordamida yiliga 132 soat vaqt tejamoqda – tadqiqot

Philips kompaniyasining "Future Health Index" tadqiqoti 10 ta mamlakatda ikki bosqichli so‘rovnoma shaklida o‘tkazildi: ulardan birida 2011 nafar tibbiyot xodimi, ikkinchisida esa 20 085 nafar bemor ishtirok etdi.

Sog‘liqni saqlash xodimlari sun’iy intellektdan asosan ishga doir fikrlarni muhokama qilish uchun “hamkor” sifatida, klinik qaydlarni matnga o‘girish yoki bemorlar qabulini rejalashtirish kabi vazifalarda foydalanishadi.

Klinik nuqtayi nazardan, sun’iy intellekt xavfli dori-darmonlar birikmasidan ogohlantirishi, alomatlarga asoslanib tashxis taklif qilishi, rentgen va boshqa skanerlash tahlillariga yordam berishi mumkin.

So‘rovda qatnashgan mutaxassislarning 46 foizi yiliga o‘rtacha 132 soat vaqt tejayotganini, 50 foizi esa sun’iy intellekt bemorlarni qabul qilish imkoniyatini oshirganini bildirdi.

Hamshiralar va shifokorlarning ta’kidlashicha, sun’iy intellekt ularga aniqroq va ehtiyotkorroq bo‘lishga hamda holatlarni batafsil tahlil qilishga yordam bergan.

Biroq sun’iy intellektdan foydalanish sur’ati tashkilotlar tomonidan uni rasmiy joriy etishdan o‘zib ketdi: shifokorlarning 64 foizi ish joyidagi vositalar ehtiyojlarini qondirmasa, o‘zlarining shaxsiy SI vositalariga murojaat qilmoqda.

Sog‘liqni saqlash sohasi mutaxassislarining 70 foizi faoliyat yurituvchi ishxonasida sun’iy intellektga asoslangan vositalar bo‘yicha treninglar yo‘qligini, cheklanganligini yoki izchil emasligini aytgan.

Mutaxassislarning 90 foizi sun’iy intellekt rivojlangan sari jarayonda inson ishtirokini saqlab qolish muhimligini ta’kidlagan; 86 foizi esa sun’iy intellektning barcha natijalari inson nazoratini talab qilishini aytgan.