Ҳўрмуздаги кескинлик: дунё озиқ-овқат хавф остидами?

FAO (БМТнинг Озиқ-овқат ва қишлоқ хўжалиги ташкилоти) Ҳўрмуз бўғозида юзага келган кескинлик глобал озиқ-овқат тизимига жиддий таҳдид солиши мумкинлигини маълум қилди.

Ушбу ҳудуд орқали жаҳон савдосининг катта қисми амалга оширилади.

Ҳозирча глобал нархлар кескин ошмаган. Бу асосан мавжуд захиралар ҳисобига таъминланмоқда. Бироқ мутахассислар огоҳлантирмоқда: агар вазият узоқ давом этса, йил охирига келиб ҳосилдорлик пасайиши, озиқ-овқат нархларининг ошиши ва инфляция кучайиши мумкин.

Энг катта хавф эса камбағал давлатлар учун юзага келади. Ўғит танқислиги экинлар ҳосилдорлигига таъсир қилиб, миллионлаб инсонлар учун озиқ-овқатга кириш имкониятини чеклаб қўйиши мумкин.

Шу тариқа, Ҳўрмуздаги ҳар қандай узилиш энди фақат минтақавий муаммо эмас — у бутун дунёда озиқ-овқат хавфсизлигига таъсир кўрсатувчи омилга айланмоқда.