Испания ҳукумати тахминан 500 минг нафар ҳужжатсиз муҳожирга ҳуқуқий мақом олиш учун ариза топшириш имконини берувчи амнистия дастурини тасдиқлади.
Бош вазир Педро Санчес маъмурияти томонидан сешанба куни қабул қилинган ушбу чора 16 апрелдан бошлаб ариза топшириш жараёнига йўл очади.
Бу фармон, иммиграцияга қарши кайфиятлар кучайиб бораётган Европа ва дунёнинг бошқа кўплаб мамлакатлари орасида Испанияни ажратиб туради.
Унга кўра, маълум шартларга жавоб берадиган шахслар бир йиллик яшаш ва ишлаш учун рухсатнома сўрашлари мумкин бўлади.
Миграция вазири Элма Саизнинг айтишича, мигрантлар пайшанба кунидан онлайн, 20 апрелдан бошлаб эса шахсан мурожаат қила оладилар. Аризаларни қабул қилиш 30 июнда якунланади.
Ариза топширувчилар Испанияга 1 январгача келган бўлишлари керак. Шунингдек, мамлакатда камида беш ой давомида яшаганини ҳамда судланмаганлигини исботлашлари лозим.
Бир йилдан сўнг ушбу вақтинчалик чора қўлланилган шахслар бошқа турдаги ишлаш ёки яшаш рухсатномаларига ариза топшириш ҳуқуқини қўлга киритадилар.
Испаниянинг кексайиб бораётган жамияти олдида турган муаммоларни бартараф этишда иммиграциядан фойдаланишга интилаётган Санчес бу қадамни “адолат ва зарурият ҳаракати” дея баҳолади.
Ҳукумат ҳисоб-китобларига кўра, Испанияда эркин яшай олмаётган 500 000 одам бу ҳуқуқни қўлга киритиши мумкин. Таҳлилчилар эса бу рақам анча юқори бўлиши эҳтимолини айтишмоқда.
Сешанба куни иммиграция ходимларининг манфаатларини ҳимоя қилувчи касаба уюшмаси ҳукумат ушбу вазифага тайёр эмаслигини таъкидлаб, кўпроқ ресурслар ажратишни талаб қилди.
Тараққиётнинг секинлашиши
Санчес бу қадамни “зарурат” деб ҳисоблаб, “агар янги одамлар ишламаса ва ўз ҳиссасини қўшмаса... ривожланиш секинлашади”, дея огоҳлантирди.
“Айнан мигрантларнинг ишчанлиги туфайли Испания иқтисодиёти ҳозирда Европада энг тез ўсаётган иқтисодиётдир”, — дея таъкидлади Санчес.
Сўнгги йилларда Испания аҳолиси кескин ўсиб, қарийб 50 миллион кишига етди ва унинг 10 миллионга яқини, яъни ҳар беш кишидан бири мамлакат ташқарисида туғилган.
Уларнинг аксарияти қашшоқлик, зўравонлик ёки сиёсий беқарорликдан қочиб келган колумбияликлар, венесуэлаликлар ва марокашликлардир.
