Ўзбекистоннинг ташқи савдо айланмаси 8,1 фоизга ўсди: экспорт камайиб, импорт ҳажми ошган

2026 йилнинг январь-июль ойларида Ўзбекистоннинг ташқи савдо айланмаси (TSA) 49,5 млрд АҚШ долларини ташкил этиб, 2025-йилнинг мос даврига нисбатан 3,7 млрд АҚШ долларига ёки 8,1 фоизга ошди. Бу ҳақда миллий статистика қўмитаси хабар берди.

TSAнинг умумий ҳажмида экспорт 19,9 млрд АҚШ долларини (2025-йилнинг январь-июль ойларига нисбатан 3,6 фоизга камайган), импорт эса 29,6 млрд АҚШ долларини (2025-йилнинг январь-июль ойларига нисбатан 17,8 фоизга ошган) ташкил этди. Натижада 9,7 млрд АҚШ доллари миқдорида манфий салдо қайд этилди.

Айни пайтда олтинни ҳисобга олмаганда, товарлар экспорти ўтган йилнинг мос даврига нисбатан 27,7 фоизга ўсиб, 9,8 млрд АҚШ долларини ташкил қилди.

Ўзбекистон жаҳоннинг 200 дан ортиқ мамлакати билан савдо алоқаларини амалга ошириб келмоқда. Ўзбекистон ташқи савдо айланмасининг юқори улуши:

• Хитой (22,7 фоиз);
• Россия Федерацияси (16,4 фоиз);
• Қозоғистон (6,6 фоиз);
• Туркия (3,3 фоиз);
• Афғонистон (2,5 фоиз) ҳиссасига тўғри келди.