“Яширин иқтисодиёт харитаси” платформаси ишга туширилади

Президент Шавкат Мирзиёев яширин иқтисодиёт улушини қисқартириш ва соҳада прокурор назорати самарадорлигини ошириш юзасидан тақдимот билан танишди.

Бу борада тизимли ишлар амалга оширилиши натижасида:

• сўнгги икки йилда кузатилмайдиган иқтисодиёт улуши 35 фоиздан 23 фоизгача камайди;
• буджетга қўшимча 38 триллион сўм ундирилди;
• расмий банд аҳоли сони 8,5 миллион нафардан ошди;
• расмий ўртача иш ҳақи эса 6,5 миллион сўмга яқинлашди.

Шу билан бирга, яширин иқтисодиёт улуши ҳали ҳам юқорилигича қолмоқда.

Хуфиёна айланмаларнинг жорий ҳолати

Жорий йилнинг биринчи чорагида кузатилмайдиган иқтисодиёт ҳажми соҳалар кесимида қуйидагича:

-      қишлоқ хўжалигида 81,1 триллион сўм;

-      савдо ва хизмат кўрсатиш соҳасида 24,5 триллион сўм;

-      қурилишда 23,9 триллион сўм;

-      саноатда 6,7 триллион сўм.

Мамлакатда 2030-йилгача яширин иқтисодиёт ҳажмини икки баробар қисқартириш, расмий банд аҳоли сонини 14 миллион нафарга, нақдсиз тўловлар улушини 75 фоизга етказиш мақсад қилинган.

“Яширин иқтисодиёт харитаси”

Тақдимотда Бош прокуратура томонидан яратилган ва синов тариқасида ишга туширилган “Яширин иқтисодиёт харитаси” платформасининг имкониятлари ҳақида ахборот берилди.

Платформа иқтисодиётнинг 22 та асосий тармоғи, 85 та соҳа, 14 та маъмурий ҳудуд ва 208 та туман-шаҳар кесимида яширин айланмалар хавфини аниқлаш ва масъуллар томонидан уларнинг бартараф этилишини назорат қилади.

Натижада у буджет даромадларини ошириш ҳамда соғлом рақобатни қўллаб-қувватлашга хизмат қилади.

Платформа таҳлиллари асосида яширин иқтисодиёт хавфи ва эҳтимолий буджет йўқотиши миқдоридан келиб чиқиб, соҳа ва ҳудудлар автоматик тарзда “яшил”, “сариқ” ҳамда “қизил” тоифаларга ажратилади.

Мазкур платформа орқали лицензиясиз фаолият юритиш, ҳақиқий айланма, иш ўринлари ва меҳнатга ҳақ тўлаш жамғармасини яшириш, рентабеллик ва фойдани камайтириш каби хавфлар автоматик аниқланади.

Масъулларга 1 октабрга қадар 70 дан ортиқ ахборот тизимини платформага интегратсия қилиш, 1 январга қадар барча ҳудудлар ва соҳаларни ушбу платформа билан қамраб олиб, тўлиқ ишга тушириш топширилди.

Шунингдек, барча тадбиркорлик субектлари учун тенг рақобат шароитларини яратиш ва яширин иқтисодиётни қисқартиришда мутасаддиларнинг масъулиятини оширишда прокурор назоратини кучайтириш вазифаси қўйилди.