Исроил Ғазога 153 тонна бомба ташлаганини Нетаньяҳу тан олди

Нетаньяҳу Кнессет (парламент) йиғилишидаги чиқиши давомида оташкесимга қарамасдан амалга оширилган ҳаво зарбалари ҳақида сўзлар экан, нутқи оппозиция депутатлари томонидан бир неча марта бўлиниб, тўхтаб қолгани хабар қилинди.

Унинг айтишича, Исроилни сўнги ҳужумлари натижасида Ғазонинг турли ҳудудларида 44 нафар фаластинлик ҳалок бўлган.

“Оташкесим ҲАМАСга бизга таҳдид қилиш ҳуқуқини бермайди. Исроилга ҳар қандай ҳужум қаттиқ оқибатларга олиб келади”, — деди Нетаньяҳу.

У ҲАМАСни оташкесим шартларини бузишда айблаб, қўшимча қилди:

“Оташкесим вақтида икки нафар аскаримиз ҳалок бўлди. ҲАМАС бизни босимни камайтирди деб ўйлади. Биз Ғазо бўйлаб ўнлаб нуқталарни нишонга олдик ва 153 тонна бомба ташладик”.

Исроил армияси аввалроқ ҲАМАСнинг Рафаҳ шаҳридаги гўёки ҳужумига жавобан Ғазонинг бир нечта ҳудудларини бомбалаганини маълум қилган эди.

ҲАМАСнинг ҳарбий қаноти эса оташкесим шартларига қатъий риоя қилаётганини ва Рафаҳдаги воқеаларга алоқаси йўқлигини билдирган.

Фаластин манбалари маълумотига кўра, Рафаҳдаги тўқнашувлар ҲАМАС жангчилари билан Исроил қўллаб-қувватлаб келадиган Ясир Абу Шебаб бошчилигидаги қуролли гуруҳ ўртасида содир бўлган.

Ҳужумлардан сўнг Исроил армияси Ғазода оташкесим режими қайта тикланганини эълон қилди.