Кремль уруш харажатларини қоплаш учун солиқларни оширмоқчи

Россиянинг Украинага бостириб кириши давлат ғазнасига жиддий таъсир ўтказаётган пайтда, Владимир Путин бошчилигидаги ҳукумат урушни молиялаштириш учун маблағ изламоқда.

Шу мақсадда, у тобора тинч аҳоли эҳтиёжларини иккинчи даражага туширган ҳолда солиқларни оширишни режалаштирмоқда.

Мамлакатнинг 2027–2029 йилларга мўлжалланган давлат бюджети 29 октябрь куни парламент томонидан уч ўқишнинг биринчисида маъқулланди.

AP News нашрининг ёзишича, парламент амалда мустақиллигини тўлиқ йўқотган. Ушбу бюджет сентябрь ойидаги парламент сайловларидан сўнг эълон қилинган бир қатор оширилган солиқларни ҳам ўз ичига олган.

Ўтган йили Кремль солиқларни ёппасига ошириб, харид чекларидаги қўшилган қиймат солиғини (ҚҚС) кўтарган ва кўпгина кичик бизнес вакилларини ҚҚС тўлашга мажбур қилганди. Бироқ бу сафар «пул ундириш» чоралари торроқ доирани — тоғ-кон саноати компанияларини, шунингдек, инвестиция даромадлари, мулк савдоси ва банк ҳисобварақларига эга бўлган бадавлат фуқароларни нишонга олган.

Бу йилги бюджет тақчиллиги кутилган прогнозлардан ошиб кетди. Бунга ноҳарбий компаниялар учун юқори фоиз ставкалари, ишчи кучи етишмаслиги ва Украинанинг нефтьни қайта ишлаш заводлари-ю, экспорт терминалларига зарбалари, шунингдек, ҳаддан ташқари катта ҳарбий харажатлар ва суст иқтисодий ўсиш сабаб бўлган.

Киев иқтисодиёт мактаби маълумотларига кўра, август ойи якунига келиб тақчиллик 5,8 триллион рублга (72 миллиард доллар) етган. Бу ўтган йилги кўрсаткичдан деярли 50 фоизга кўп ва аввалроқ қайта кўриб чиқилган 4,8 триллион рубллик мақсадли кўрсаткичдан ҳам юқори.

Кончиликдан тортиб хорижий харидларгача янги солиқлар

Ўтган йилдан бери нархлар кўтарилган. Ҳукумат бу жараёнда фойда кўрган тоғ-кон компанияларининг қўшимча даромадига 20–30 фоиз миқдорида солиқ солишни таклиф қилмоқда. Бунинг темир рудаси, никель ва олтин қазиб олувчи компанияларга таъсири катта.

Яна бир чора фоизлар, дивидендлар ва мулк сотишдан олинган даромадларга 13 фоиздан 22 фоизгача бўлган юқори ставкаларни белгилайди. Ҳозирда бундай даромадлар миқдори 2,4 миллион рублдан (29 800 доллар) кам бўлганда 13 фоиз ва ундан ошганда 15 фоиз ставкада солиққа тортилади.

1 январдан кучга кирадиган бошқа таклифлар қаторига ҳар бир жўнатма учун 100 рубллик тўлов ҳамда онлайн харид қилинган, қиймати 200 евродан кам бўлган ва илгари солиқдан озод этилган хорижий товарлар учун 22 фоизлик ҚҚС киритилган. Шунингдек, «дўст бўлмаган мамлакатлар»даги хорижий инвесторларнинг чекланган ҳисоб рақамларига тўланадиган дивидендларидан 35 фоизлик солиқ ҳам ундирилади.