Путин: “Менимча, урушни тугатиш имконияти бор”

3 сентябрь куни Россиянинг Узоқ Шарқидаги иқтисодий форумда сўзга чиққан Владимир Путин қатор давлатлар, жумладан, АҚШ ва Хитой тинчлик келишувини қўллаб-қувватлашга тайёр эканини айтди. Бу ҳақда Reuters хабар берди.

“Бироқ, якунда, муаммони можарога алоқадор давлатлар — Россия ва Украина ҳал қилиши керак. Биз келишувга ҳисса қўшишга уринаётган ҳар бир кишидан миннатдормиз. Имконият борми? Назаримда, ҳа, бор”, — деди Путин.

Зеленский эса тунги видеомурожаатида АҚШ музокарачиларининг ташрифи учун дастлабки саналар белгиланганини айтди.

“Биз АҚШ президенти вакилларини Киевда кутиб қоламиз”, — деди Зеленский.

Зеленскийнинг айтишича, Эрон билан можаросини давом эттираётган Дональд Трамп Украина уруши тугашини ҳамда ҳар икки томон кўраётган йўқотишларга барҳам берилишини истайди.

Аввалроқ Трамп журналистларга Кремль раҳбари тинчлик келишувига тайёр бўлгач, Путин билан саммит ўтказиш ниятида эканини айтган эди.

Иккинчи жаҳон урушидан кейин Европада юз берган энг қонли можарога 4,5 йил тўлди. Томонлар сўнгги бор февраль ойида АҚШ воситачилигидаги музокараларда учрашганди.

Ўшандан бери АҚШ Эрон уруши билан овора. Бу вақтда эса Россия ва Украина бир-бирининг ҳудудига узоқ масофали ҳаво ҳужумларини кучайтирди. Денгиздаги зиддиятлар ҳам кескинлашиб, ҳар икки томоннинг портлар ва савдо кемаларига ҳужумлари дунёда ғалла нархини ошириб юборди.

Путин: “Украина билан алоқаларимиз бардавом”

“Яқинда Украина олий раҳбариятининг баёнотларини инобатга оладиган бўлсак, бу алоқалар қай даражада тинчлик битимига олиб келиши ҳақида бирон нима дейишим қийин. Шундай бўлса-да, махфий алоқалар мавжуд ва узлуксиз давом этмоқда”, – деди Путин.