«Қоплонбек» чегара пунктида ўзбекистонлик ҳайдовчилардан пул талаб қилган шахс ҳибсга олинди

Маълум қилинишича, ушбу шахс "Қоплонбек" чегара постидан ўтувчи ўзбекистонлик ҳайдовчиларнинг йўлини тўсиб, пул ундириб келган.

Гумонланувчи ҳибсга олинди

Қозоғистон Республикаси Ички ишлар вазирлиги маълумотига кўра, тезкор-қидирув тадбирлари давомида Туркистон вилоятининг 43 ёшли фуқароси ушланган.

Айтилишича, у ишсиз бўлган ва доимий яшаш жойига эга эмас.

Гумонланувчи ҳозирда Сариоғоч тумани полиция бошқармасининг вақтинчалик сақлаш ҳибсхонасига жойлаштирилган.

Тергов ҳаракатлари давом этмоқда

Ҳуқуқни муҳофаза қилувчи органлар ҳозирда иш бўйича зарур тергов ҳаракатларини олиб бормоқда.

Полиция ҳар қандай қонунга зид ҳаракатлар Қозоғистон қонунчилиги асосида жавобгарликка сабаб бўлишини эслатди.

Шунингдек, чегара ҳудудида хавфсизлик ва жамоат тартибини таъминлаш масаласи алоҳида назоратга олингани билдирилди.

Фуқаролардан фақат расмий манбаларга ишониш ва тасдиқланмаган хабарларни тарқатмаслик сўралди.