Россиянинг Украинага зарбалари оқибатида 17 киши ҳалок бўлди

Украина расмийларининг маълум қилишича, Россия 5 август куни Киев ва унга туташ ҳудудларга ўнлаб баллистик ракеталар билан зарба берган. Ҳужум оқибатида камида 17 киши ҳалок бўлиб, йирик савдо тармоқларининг омборхоналари ва логистика марказлари вайронага айланди. Бу ҳақда Reuters хабар берди.

Расмийларга кўра, ҳаво ҳужумидан мудофаа ракеталари танқислиги Украинани заифлаштирмоқда.

«Баллистик ракеталарни тутиб олувчи тизимлар бугун ўлганларнинг ҳаётини сақлаб қолиши мумкин эди», — деди президент Володимир Зеленский.

Унинг қўшимча қилишича, ҳаво ҳужумидан мудофаа ракеталарини етказиб бериш 2025 йилга нисбатан уч баравар камайган.

Украина ҳаво мудофааси Россия томонидан учирилган 115 та дрондан қарийб 90 фоизини уриб туширган, бироқ 24 та баллистик ракета ва тўртта «Сиркон» қанотли ракетасидан бирортасини ҳам тутиб қололмаган, дейилади Ҳарбий ҳаво кучлари хабарида.

Россия Мудофаа вазирлиги Киев ва вилоятдаги еттита логистика марказига зарба берганини маълум қилар экан, уларни икки мақсадда ишлатиладиган маҳсулотлар ҳамда дрон қисмларини сақлаш ёки тарқатишда фойдаланганликда айблади.

Украина сўнгги ойларда АҚШнинг «Patriot» тизимлари учун зарур бўлган ҳаво мудофааси ракеталари етишмовчилигидан азият чекмоқда. Бу тизим Украина қурол-яроғлари ичида Россиянинг товушдан ҳам тез ҳаракатланувчи баллистик ракеталарини уриб туширишга қодир ягона қуролдир.

Украинада уруш бошланганидан кейин Киев учун мўлжалланган «Patriot» тизимлари февраль ойидан АҚШ ҳарбийлари ва Форс кўрфазидаги иттифоқчиларига йўналтирилмоқда.

Айни пайтда, фронтдаги юриши жиддий секинлашган Россия Украинага баллистик зарбаларини кучайтирган.