Украинада “Patriot” тутиб олувчилари ишлаб чиқаришга рухсат берилади — Трамп

Дональд Трамп НАТОнинг Анқарадаги саммитида Украина президенти Володимирь Зеленский билан учрашиб, АҚШ Украинага Патриот ҳаво мудофаа тизими учун ракета тутиб қолувчиларни ишлаб чиқариш лицензиясини беришини маълум қилди.

“Биз сизга “Патриот”ларни ишлаб чиқариш учун лицензия бермоқчимиз. Бу жуда зўр. Шунда сиз бизга “етарлича ёрдам бермаяпсиз” деб айта олмайсиз”, — деди Трамп.

Унинг таъкидлашича, Патриот ҳужум эмас, балки мудофаа қуроли бўлгани сабабли бу қарорга кеган.

Трамп қўшимча тафсилотларни очиқламади, аммо учрашув оҳанги унинг аввалги кескин танқидларидан тубдан фарқ қилди. Илгари Трамп Зеленскийни ҳатто “ношукр” деб ҳам атаган эди.

Бу сафар эса Трамп улар ўртасида яхши муносабатлар шаклланганини, шунингдек, Москва ҳам, Киев ҳам уруш тугашини истаётганини таъкидлади.

АҚШ президенти шу куннинг ўзида Владимир Путин билан ҳам телефон орқали мулоқот режалаштирганини маълум қилди. У Зеленскийни уруш шароитида самарали фаолият юритган лидер сифатида баҳолади.

“Патриот”лар Украинада чиқарилади

Қўшимча Патриот ракеталари зудлик билан юбориладими, деган саволга Трамп айрим ракеталар дарҳол етказилиши мумкинлигини айтди. Унинг фикрича, Украина ҳам қисқа муддат ичида уларни ўзи ишлаб чиқара олади.

“Бизда “Патриот”лар бор, аммо сони кўп эмас. Улар ўзимизгаям керак. Назаримда, улар буни анча тез ишлаб чиқара олади. Биз тушунтириб берганимиздан сўнг, компанияни шу ерга olib келамиз. Сиз компания билан ишлайсиз. Уларда қурол-яроғ, ҳатто анча мураккабларини ҳам ишлаб чиқариш учун зўр салоҳият бор” — деди Трамп.

Зеленский анча вақтдан бери АҚШдан Патриот ракеталарини сўрайди. Чунки айнан шу тизим Россия учираётган баллистик ракеталарни уриб туширишга қодир бўлган ягона ҳаво мудофаа воситаси ҳисобланади.

Tramp “Patriot” ракеталарини ишлаб чиқариш учун компанияларга босим ўтказилиши мумкинлигини таъкидлади. “Биз “Patriot”ни ишлаб чиқарадиган компаниялар устидан катта кучга эгамиз”, деди у.

“Биз бу ҳақда компанияни ҳали хабардор қилмадик, лекин ҳаммаси жойида бўлади. Ишончим комилки, улар бундан мамнун бўлишади”, деди Трамп.

“Локхид Мартин” компанияси “Патриот” тизимида қўлланиладиган тутиб олувчи ракеталарнинг асосий пудратчиси ҳисобланади.

Россия ҳужумларни давом эттирмоқда

Россия чоршанбага ўтар кечаси яна Киевга баллистик ракеталар билан ҳужум қилди. Бу бир ҳафтадан кам вақт ичида пойтахтга уюштирилган зарбаларнинг учинчисидир.

Украина ҳарбий-ҳаво кучлари маълумотларига кўра, тунда учирилган 169 та дрондан 139 таси уриб туширилган. Бироқ АҚШда ишлаб чиқарилган Патриот ракеталари танқислиги сабабли бешта баллистик ракетанинг бирортаси йўқ қилинмаган.

АҚШ Украина дронларини сотиб олиши мумкин

Зеленский Трамп билан урушни тугатишга оид муҳим масалаларни муҳокама қилмоқчи эканини айтар экан, унга шундай деди: “Сиз бу урушни тўхтатиш учун қўлингиздан келган барча ишни қилишингизга ишонаман”.

Трамп эса “Биз бир талай урушларни тўхтатдик. Бошида бу урушни жуда осон тугатамиз деб ўйлабман. Аммо Путин ҳам, Зеленский ҳам мураккаб шахс”, — деди.

Трамп АҚШ ҳам ўз навбатида Украинада ишлаб чиқарилаётган дронларга харидор бўлиши мумкинлигини айтиб ўтди. Уруш давомида Украина дунёдаги энг ривожланган дрон саноатларидан бирини шакллантиришга муваффақ бўлди.

Ҳозирга қадар Киев дрон ишлаб чиқариш бўйича тўққизта халқаро ҳамкорлик битимини имзолаган. Улар орасида Дания, Эстония ва Нидерландия билан тузилган келишувлар ҳам бор.