Зилзиладан сўнг Венесуэлага бепул интернет тақдим этилди

Илон Маскнинг SpaceX компаниясига қарашли сунъий йўлдош интернет тармоғи — Starlink иккита зилзила содир бўлган Венесуэладаги фойдаланувчиларига бир ой давомида бепул хизмат кўрсатишини маълум қилди. Бу ҳақда Reuters хабар берди.

"Шунингдек, компания Starlink терминалларини тезда жойлаштириш ва энг кўп жабр кўрган ҳудудларда алоқани тиклаш устида ишламоқда", — дейилади Starlink'нинг Х'даги хабарида.

Сунъий йўлдош интернетининг афзалликлари

Табиий офатдан сўнг ишончли интернет алоқаси энг муҳим ресурслардан бирига айланади. Оилалар у орқали бедарак йўқолган яқинларини излайди, фавқулодда хизматлар ходимлари қутқарув ишларини мувофиқлаштиради, шифохоналар муҳим маълумотларни улашади, гуманитар ташкилотлар эса ёрдам етказиб беришни ташкиллаштиради.

Венесуэланинг айрим ҳудудларида электр энергияси таъминотидаги узилишлар ва телекоммуникация инфратузилмасининг шикастланиши кузатилаётган бир пайтда, сунъий йўлдош интернети анъанавий уяли алоқа станциялари ҳамда фибернетик тармоқлар ишдан чиққан ҳолатлар учун муқобил ечим таклиф қилади.

Starlink фақат ер усти инфратузилмасига таяниб қолмасдан, паст Ер орбитасидаги сунъий йўлдошлар гуруҳи орқали ишлайди. Шунинг учун табиий офатлар анъанавий тармоқларга зарар етказганидан сўнг алоқани анча тезроқ тиклай олади.

Кимлар учун бепул?

Бепул хизмат жабр кўрган ҳудудлардаги мижозлар учун амал қилади. Starlink'нинг маълум қилишича, мазкур ҳудудлардаги мавжуд фаол мижозларнинг ҳисобларига автоматик тарзда кредитлар ўтказилади. 

Собиқ обуначилар эса тақдим этилган кредитлар ёрдамида сервисларни қайта фаоллаштиришлари мумкин.

Шунингдек, компания алоқа узилиб қолган ҳудудларни қайта улаш мақсадида офат зонасига қўшимча Starlink терминалларини тезда жойлаштириш устида иш олиб бормоқда.

Аввалроқ Венесуэлада кузатилган ҳалокатли зилзила ҳақида хабар бергандик.