Yevropa Ittifoqi va Ukraina dron ishlab chiqarish bo‘yicha kelishuvga erishdi

Ukraina va Yevroittifoq Kiyevning tajribasi hamda Yevropaning sanoat salohiyatini birlashtirishga qaratilgan “dron kelishuvi”ni imzoladi.

Endi qo‘shma loyihalar yo‘lga qo‘yilib, dron ishlab chiqarish hajmi oshiriladi. Bu haqda Yevrokomissiya prezidenti Ursula fon der Lyayen 15-iyul kuni ma’lum qildi.

“Biz kuchli tomonlarimizni birlashtirishimiz lozim.  Bu kelishuv Ukraina ixtirochiligi va Yevropaning sanoat masshtabini birlashtiradi”, — dedi fon der Lyayen Kiyevda Ukraina Davlatchiligi kuni sharafiga o‘tkazilgan marosimdagi nutqida.

Ukraina bungacha alohida davlatlar bilan ham shunday hamkorlik bitimlarini imzolagan.

Xususan, 7-8-iyul kunlari Anqarada bo‘lib o‘tgan NATO sammitida prezident Volodimir Zelenskiy yana 3 ta dronlar bo‘yicha kelishuv imzoladi. Uning aytishicha, bu kabi bitimlar soni to‘qqiztaga yetgan.

Chorshanbada imzolangan hujjat esa Yevropa Ittifoqiga a’zo davlatlar va kompaniyalarni qamrab oladigan ilk kelishuvdir.

“Sizning dron va antidron tizimlarini boshqarish bo‘yicha orttirgan tajribalaringiz chindan ham bebaho”, — dedi fon der Lyayen Zelenskiyga murojaat qilib.

“Biz ushbu imkoniyatdan birgalikda foydalanishimiz kerak. Chunki Yevropa bu sohada qanday tahdidlarga duch kelayotganini yaxshi bilamiz. Yevroittifoqning ko‘plab davlatlarida havo hududiga noqonuniy kirish holatlari va ogohlantirishlar kuzatilmoqda”, – deya qo‘shimcha qildi u.

Fon der Lyayenning so‘zlariga ko‘ra, Yevropa Ittifoqi Ukrainaga “katta texnologik va sanoat salohiyati” hamda “xavfsiz va ishonchli ishlab chiqarish maydonlari”ni taklif qiloladi.

Eksport qilinayotgan dron tajribasi

Rossiya 2022-yil fevralida Ukrainaga bostirib kirgan paytda mamlakat dron sohasida cheklangan tajribaga ega edi. Shundan so‘ng Ukraina yuqori darajada rivojlangan dron sanoatini shakllantirib oldi.

Zelenskiy dron bo‘yicha hamkorlik bitimlarini kengaytirish maqsadida turli davlatlarga tashrif buyurmoqda. Ayniqsa, Fors ko‘rfazi mamlakatlari Eron hujumlariga qarshi kurashishda Ukrainaning tajribasidan foydalanishga katta qiziqish bildirgan.