«Ақлга озуқа бўладиган китоблар»: ALP нашриётида рейд ўтказилди

«ALP» нашриёти раҳбари Алишер Файзуллаев ижтимоий тармоқлардаги саҳифасида маълум қилишича, Чилонзор тумани Ички ишлар бошқармасининг бир гуруҳ ходимлари нашриётга келиб, 5 274 дона китобни олиб кетган. Олиб кетилган нашрлар орасида Шуҳрат Бобожоннинг «Тайм машин: 1984» асари лотин ва кирилл алифбосидаги нусхалари ҳамда Жидду Кришнамуртининг «Билгандан озодлик» китоби бор.

Нашриёт раҳбарининг таъкидлашича, 10 сентябрь куни чоп этилган китоблар «Узкомнадзор» (расмий номи: «Ўзкомназорат»)да муҳокама қилингани айтилган. Бироқ нашриёт раҳбари ва китоблар муҳаррири сифатида у бундай муҳокама ҳақида хабардор қилинмаган.

«Сизга 5 сентябрдан телефон қилиб туша олмаганмиз», — деган рейдда иштирок этган ташкилот ходимларидан бири.

«Тайм машин: 1984»

«Тайм машин: 1984» романи воқеалари 1984 йилги Тошкент билан боғлиқ бўлиб, унда тарихий шахслар, турли даврлар ва географик маконлар ўзаро боғланади. Асарнинг ўзига хос жиҳати — унда замон ва маконнинг мураккаб уйғунлиги мавжуд, воқеалар оддий ва тушунарли тилда баён этилади.

Нашриёт раҳбарининг таъкидлашича, романда жамиятда учрайдиган қусурлар, жумладан, фоҳишалик ва сўкиниш каби ҳолатлар ҳам тасвирланган. Китобдаги бундай ифодалар бадиий зарурат билан қўлланган, нашр эса 18+ ёш белгиси билан чиқарилган.

Ношир роман ўқувчида фантазия ва тафаккурни ривожлантириши, жамиятга танқидий муносабатни шакллантириши, илм-фанга қизиқиш уйғотиши ҳамда одамлар ўртасидаги бирдамлик масаласини кўтаришини таъкидлаган.

«Билгандан озодлик»

Нашриётдан олиб кетилган яна бир китоб — Жидду Кришнамуртининг «Билгандан озодлик» асари.

Кришнамурти замонавий дунё тафаккурига таъсир кўрсатган файласуфлардан бири бўлиб, асарда инсоннинг ўзлаштирган билимлари, онгида шаклланган қарашлар ва уларнинг ҳаётига таъсири ҳақида сўз боради.

Нашриёт раҳбари китобни диний қарашларга таҳдид сифатида баҳолашдан олдин уни ўқиб чиқиш ва ундаги фикрларни, жумладан, сўфийлик фалсафаси билан қиёслаб кўришни таклиф қилган. Чунки асар инсоннинг ички хотиржамлиги, билимнинг моҳияти ва шахсий мақсадларини қайта кўриб чиқишга ундайди.

«Назаримда, терроризм ва диний экстремизм ғоялари билан суғорилган китоблар эмас булар», — деб ёзган ношир.

Ҳозирча ҳолат юзасидан расмий изоҳ берилмади. Шунингдек, мазкур китоблар кенг миқёсда сотилмоқда.