Толибон эркак шифокорларнинг аёлларни даволашини чекламоқда

Афғонистонда Толибон эркак шифокорларнинг аёл беморларни даволашига нисбатан чекловларни кучайтирмоқда. Мамлакатнинг бир қатор ҳудудларида эркак шифокорларга аёлларни эркак қариндоши — маҳрам иштирокисиз кўрикдан ўтказиш ва даволаш тақиқланган. Бу ҳақда The Guardian ва Zan Times нашрлари беморлар ҳамда тиббиёт ходимлари билан ўтказган суҳбатларига таяниб хабар берди.

Нашр маълумотларига кўра, чекловлар айрим ҳудудларда стоматологларга ҳам татбиқ этилмоқда. Толибон хавфсизлик кучлари хусусий клиникаларда текширувлар ўтказиб, аёл беморларни қабул қилган эркак стоматологларни қамоққа олиш билан огоҳлантираётгани айтилган.

Шифокорлар билдиришича, маҳрамсиз келган аёл беморларни ҳатто шошилинч ҳолатларда ҳам кўрикдан ўтказишга рухсат берилмаяпти. Айрим ҳолатларда тиббий муолажаларни фақат аёл ҳамширалар бажариши ёки бемор ёнида эркак қариндоши бўлиши талаб қилинмоқда.

Афғонистон шимолидаги давлат шифохоналаридан бирида 15 йилдан бери ишлаётган жарроҳ Самимнинг айтишича, беморнинг аҳволи қанчалик оғир бўлишидан қатъи назар, маҳрамсиз аёлни бевосита кўрикдан ўтказиш мумкин эмас.

Аёл шифокорлар етишмовчилиги муаммони кучайтирмоқда

Афғонистонда аёл шифокорлар етишмаслиги мавжуд чекловларнинг оқибатларини янада оғирлаштирмоқда. 2024 йил декабридан бошлаб Толибон аёлларнинг тиббий таълим муассасаларида таҳсил олишини ҳам тақиқлаган. Шунингдек, шифохоналарда аёл ходимларни ишга қабул қилишга тўсқинлик қилинаётгани ҳақида маълумотлар бор.

Натижада аёллар олдида бир нечта қийин танлов қолмоқда: малакали аёл шифокорни топиш, чекловларга қарамай эркак мутахассисга мурожаат қилиш ёки тиббий ёрдамдан воз кечиш.

Нашр келтирган маълумотларга кўра, Балх вилоятидаги тиббиёт муассасаларига аёл беморларнинг исмларини айтмаслик ва тиббий ҳужжатларда уларнинг исми ўрнига «Биби» сўзини ишлатиш ҳақида кўрсатма берилгани ҳам хабар қилинган.