Трамп Оқ уйни Саддам Ҳусайн ресторанига ўхшатиб қўйди — Барак Обама

Барак Обама Кливленд ва Детройтдаги митингларда Демократик партиядан қўйилган номзодлар учун ташвиқот олиб бориб, Трамп маъмуриятини қаттиқ танқид ва ҳажв остига олди. Собиқ президент Мичиган штатида АҚШ Сенатига номзод Абдул Эл-Сайидни қўллаб-қувватлаб чиқиш қилди. У 3 ноябрь кунги сайловни Трамп президентлигининг ҳеч бўлмаганда айрим бемаъниликларини тийиб қўядиган «электр узгич»га қиёслади.

«Биз бу узгични босиб, ушбу ҳукуматни бироз бўлса-да жавобгарликка тортишимиз керак», — деди Обама.

2009 йилдан Трамп илк президентлик муддатини бошлаган 2017 йилга қадар давлатни бошқарган Обама демократлар орасида энг машҳур шахслардан биридир. Унинг сайловолди кампанияларига жалб этилиши АҚШ Сенати учун кечаётган кескин курашда ўз тарафдорларини руҳлантиради. Ушбу баҳсда Эл-Сайид АҚШ Вакиллар палатасининг собиқ аъзоси, республикачӣ Майк Рожерс билан куч синашади.

Собиқ президент Мичиган штатидаги митингда Трамп ва унинг сиёсатини қўллаб-қувватлаётган республикачиларга нисбатан тез-тез билдириладиган танқидларга урғу берди.

«Биз илгари ҳеч қачон сизнинг ҳисобингиздан бу даражада очиқчасига фирибгарлик қилишда устаси фарранг бўлиб кетган президентни кўрмаганмиз. Ҳеч қачон манфаат эвазига бу қадар илтифот кўрсатишга муккасидан кетган президентни кўрмагандик... Эндиликда ушбу партия коррупцияга ботган ҳукуматни, лаёқатсиз бошқарувни ёки умуман йўқ ҳукуматни ёқлаб чиқаётганга ўхшайди», — деди Обама.

25 октябрь куни эрта тонгда Truth Social тармоғида қолдирган постида Трамп Обамани «ўта лаёқатсиз президент» деб атади, Эл-Сайидни эса «яҳудийлар, қора танлилар, АМЕРИКАЛИКЛАР ҳамда ТРАМПДАН нафратланадиган “Мусулмон биродарлар” жиҳодчиси» дея таърифлади.

Август ойида ўтказилган Reuters/Ipsos сўровномасига кўра, америкаликларнинг 63 фоизи ўтган йили президент Оқ уйга қайтганидан буён у ва унинг оиласи криптовалютадан номақбул фойда кўрган, деб ҳисоблайди, 69 фоизи эса унинг сиёсий қарорларига шахсий бизнес алоқалари таъсир кўрсатишига ишонади.

Обама амалдаги маъмуриятнинг Эронга қарши ғалаба ҳақидаги иддаоларини ҳам танқид қилди. Унинг таъкидлашича, уруш Эронга кўпроқ иқтисодий қудрат берган, чунки унинг Ҳурмуз бўғозидаги кемаларга ҳужум қилиш таҳдидлари нефть экспортчиларини ташвишга солиб қўйди.

«Эндиликда Эрон бутун дунёга нефть етказиб бериладиган Ҳурмуз бўғози устидан вето ҳуқуқига эга», — деди Обама.

Трамп эса постида Обама маъмуриятининг эронликларга нисбатан ёндашувини танқид қилиб, у Эрон билан тузилган 2015 йилги Қўшма кенг қамровли ҳаракатлар режаси доирасида Эронга миллиардлаб доллар тўлаб, уларнинг ядровий қуролга эга бўлишига йўл очиб берганини таъкидлади. Қўшма Штатлар 2015 йилги ушбу келишувдан Трампнинг биринчи президентлик муддати даврида чиққан эди.

Собиқ президент Трамп маъмуриятини иккинчи даражали масалаларга урғу беришда ҳам айблади. У мудофаа вазири Пит Хегсетни киноя билан «ҳарбийларимизнинг жағ тузилиши ва тестостерон даражаси каби муҳим масалаларга бутун диққатини қаратган» одам деб атади ҳамда Оқ уйдаги таъмирлаш ишларини дидсизлик дея кулги қилди.

«У Оқ уйни худди Саддам Ҳусайн очган Cheesecake Factory ресторанига ўхшатиб қўйди», — деди Обама.

Шунингдек, Обама Трамп маъмурияти давридаги яшаш харажатлари ошаётгани ва иммиграция сиёсатини ҳам гапирди. Собиқ президентнинг айтишича, Трамп америкаликлар учун муҳим бўлган нархларни пасайтириш масаласига етарлича эътибор бермаяпти. У Эронга қарши урушни «ҳеч ким сўрамаган, кераксиз уруш» деб атади.

Аввалроқ Трамп АҚШ Сенатига номзод мусулмон Абдул Эл-Сайидни «жиҳодчи» деб атагани ҳақида ёзгандик.