Британия 16 ёшдан ошмаганларга ижтимоий тармоқларни тақиқламоқда

Британия Бош вазири Кир Стармер 16 ёшгача бўлганлар учун ижтимоий тармоқларни тақиқлаб, ўйин ва жонли эфир платформаларига чекловлар жорий этишини маълум қилди.

Стармернинг сўзларига кўра, кенг қамровли ўзгаришлар “болаларга болалигини қайтариб беради”. У Snapchat, TikTok ва Instagram каби платформалар ҳамда нотанишларнинг болалар билан мулоқот қилишига имкон берувчи ўйин сайтларига қарши кўриладиган чораларни санаб ўтди.

“Тўлиқ тақиқ тўғри танлов эканлиги  кундек равшан”, – деди у матбуот анжуманида. "Бу жуда катта ўзгариш ясайди, фарзандларимизни хавфсизроқ, бахтлироқ қилади, уларга талайгина вақт, хавфсизлик, улғайиш учун кўпроқ эркинлик ва имкониятлар беради”.

Ҳукуматнинг маълум қилишича, Британия ўтган йил декабрда тақиқ жорий этган Австралия моделига ўхшаш усулни қўллайди.

Ушбу тақиқ YouTube, Facebook ва X каби платформаларни қамраб олади, бироқ WhatsApp ва Signal сингари хабар алмашиш хизматларига татбиқ этилмайди.

Шунингдек, Британия 16 ёшгача бўлган болалар учун жонли эфир ва нотанишлар билан мулоқот қилиш каби зарарли функцияларга энг илғор чекловларни жорий қилади.

“Ҳеч замонда фарзандингизни ўзингиз мутлақо танимайдиган нотаниш одам билан бирга қолдирасизми? Албатта йўқ. Шунинг учун ҳам биз бу борада чора кўряпмиз”, - деди Стармер.

Унинг сўзларига кўра, ҳукумат ҳар қандай тақиқ бўйича дастлабки қадамларни қўйиш ваколатига эга.

Йил охиригача тегишли қоидалар ишлаб чиқилади ва келаси баҳорга бориб тақиқ тўлиқ кучга киради.