AI инсониятни 2030-йилгача йўқ қилиши мумкинми?

АҚШ қонун чиқарувчилари хавотир билдирди

Anthropic компаниясининг собиқ тадқиқотчиси Жейкоб Коксон сунъий интеллект яқин йилларда инсон имкониятларидан устун тизимларга айланиши ва 2030-йилгача инсоният учун жиддий хавф туғдириши мумкинлигини айтди.

Тадқиқотчи ижтимоий тармоқдаги баёнотида келажакдаги сунъий интеллект тизимлари "инсондан устун" имкониятларга эга бўлиши ва назоратдан чиқиб кетиши инсоният учун ҳалокатли оқибатларга олиб келиши мумкинлигини билдирди.

АҚШ сенаторлари ҳам хавфдан огоҳлантирди

Коксоннинг баёнотидан кейин АҚШ Конгресси аъзолари ҳам сунъий интеллект хавфсизлиги масаласига эътибор қаратди.

Техас штатидан республикачилар партияси сенатори Тед Круз cунъий идрокни "катастрофик хавф" туғдириши мумкин бўлган технология сифатида баҳолади. У аввалроқ Илон Маск билан суҳбатида сунъий интеллект инсониятни йўқ қилиши эҳтимоли ҳақида гаплашганини эслади. Крузнинг айтишича, Маск бундай эҳтимолни 10–20 фоиз деб баҳолаган.

Вермонт штатидан мустақил сенатор Берни Сандерс сунъий суперинтеллектни тақиқлаш ҳамда хавфсизлик стандартлари ишлаб чиқилгунга қадар AI ривожланишини вақтинча тўхтатиш тарафдори эканини таъкидлади.

Калифорниялик демократ конгрессмен Тед Лью Коксоннинг баёнотини сунъий зако учун хавфсизлик чораларини кучайтириш зарурлигига яна бир далил сифатида баҳолади. У Конгрессни икки партияли AI хавфсизлик тугмаси тўғрисидаги қонун лойиҳасини (AI Kill Switch Bill) тезроқ қабул қилишга чақирди.

Массачусетс штатидан демократ конгрессмен Лори Трахан эса сунъий интеллект хавфсизлиги бўйича тадқиқотчиларнинг компанияларни тарк этаётгани ва технологик фирмалар ривожланишни давом эттираётганини таъкидлаб, Конгресс фаолроқ ҳаракат қилиши кераклигини айтди.

Anthropic: хавфлар мавжуд, бироқ вазият назорат остида

Баҳслар Anthropic ва OpenAI томонидан сунъий интеллект агентлари билан боғлиқ хавфсизлик ҳодисалари ҳақида маълумотлар эълон қилинганидан кейин кучайди.

Anthropic чоршанба куни AI агентлари иштирокидаги киберхавфсизлик ҳодисалари бўйича батафсил ҳисоботини эълон қилди. Компания юз миллионлаб транскриптларни таҳлил қилиб, шунга ўхшаш ёки ундан жиддийроқ бошқа ҳолатлар аниқланмаганини билдирди.

Anthropic вакилининг айтишича, компания сунъий интеллект инсониятга катта фойда билан бирга мисли кўрилмаган хавфларни ҳам олиб келиши мумкинлигини доимо тан олган. Шу сабабли компания кучли хавфсизлик механизмларини ишлаб чиқаётганини маълум қилган.

Компания, шунингдек, кучли сунъий интеллект моделларини бозорга чиқариш суръатларини мувофиқлаштириш учун бутун саноат ҳамкорлик қилиши кераклигини таъкидлади.

Шу билан бирга, Коксоннинг инсоният 2030-йилгача йўқ бўлиб кетиши ҳақидаги прогнози ҳозирча унинг шахсий баҳоси бўлиб, бу фикр илмий ёки сиёсий консенсус сифатида қаралмайди. AI хавфсизлиги бўйича мутахассислар технологиянинг узоқ муддатли хавфлари юзасидан турлича прогнозларни илгари сурмоқда.

Муаллиф: Ҳасанбой ОЧУН