Абитуриентларнинг сал кам ярми тестдан йиқилди

Очиқ маълумотларга кўра, жорий йилда 737 минг 351 нафар абитуриент тестга кирган. Бу ўтган йилгига қараганда 151 мингга кам дегани. Тестга кирган абитуриентларнинг 345 минг 869 нафари 56,7 баллни ҳам йиға олмади. 

Блогер ва ҳуқуқшунос Хушнуддек Худойбердиевнинг таҳлилига кўра, бу натижани ўтган йилги ҳолат билан солиштирганда нисбатан яхши. 

"Умуман олганда, йилдан йилга яхши томонга ўзгариш бор. Ўтган йили 49,4% фоиз, аниқроғи 439 минг абитуриент 56,7 балл ҳам тўплай олмаганди, жорий йилда бу кўрсаткич 2.5% га яхшиланди. 2024 йилда энг ёмон кўрсаткич Сирдарё вилоятида (51,8%), нисбатан яхшироқ натижа эса доимгидек Тошкент шаҳрида (35,9%) қайд этилган", 

дейди у. 

Ўтган йили 8 та ҳудудда абитуриентларнинг 50 фоиздан кўпроғи 56,7 баллдан паст балл олган. Жорий йилда бундай ҳудудларнинг сони 4 тага тушган. Жиззах, Навоий, Қашқадарё ва Тошкент вилояти ўз натижасини яхшилаб, 50 фоиздан пастки чизиққа ўта олган. 

Қуйидаги ҳудудлар эса ўтган йилга қараганда натижасини энг кўп яхшиланган 5 та ҳудудга кирди: 

Тошкент шаҳри — 4,9 фоизга; 
Тошкент вилояти — 4,9 фоизга; 
Жиззах вилояти — 3.7 фоизга; 
Бухоро вилояти — 3,5 фоизга; 
Сирдарё вилояти — 3,1 фоизга ошган. 

"56,7 балл — бу тўплаш мумкин бўлган энг юқори 189 балнинг 30 фоизи дегани. Яъни абитуриент ҳеч бўлмаса 30 фоиз билимга эга бўлса, ушбу кўрсаткични тўплай олади. 30 фоиз билим эса рейтинг тизимидан қиёс олсак, ҳатто 2 баҳо ҳам эмас! 1 баҳо десак тўғри бўлар балки",

 дея ўз фикрини хулосалаган блогер.