Самарқанд ҳокими ташаббусига меҳнат инспекцияси эътироз билдирди

Аввалроқ вилоят ҳокими ректорлар билан учрашувда ҳар бир олий таълим муассасасига алоҳида ҳудудлар бириктирилишини маълум қилган эди. 

Унинг сўзларига кўра, бириктирилган ўқитувчи ва талабалар ҳар куни ушбу ҳудудларда юриб, кўчалар тозалиги, дарахтлар ҳолати, ногиронлар учун яратилган шароитлар ҳамда йўл инфратузилмасини ўрганиб бориши керак бўлган.

Бу ташаббус ортидан Давлат меҳнат инспекцияси Самарқанд вилояти ҳокимига расмий огоҳлантириш юборди.

Инспекция маълум қилишича, амалдаги қонунчиликка мувофиқ педагог ходимларни уларнинг касбий фаолияти билан боғлиқ бўлмаган ишларга мажбурий жалб қилиш тақиқланади.

“Бундай ташаббус амалиётга жорий этилса, у мажбурий меҳнат ҳолати сифатида баҳоланиши мумкин”, — дейилади муносабатда.

Шу муносабат билан меҳнат инспекцияси вилоят ҳокимини мазкур ҳаракатлар қонунчиликка зид экани ҳамда бу ҳолат учун жавобгарлик белгилангани ҳақида расман огоҳлантирган.

Ҳозирча вилоят ҳокимлиги мазкур огоҳлантириш юзасидан расмий изоҳ бермаган.