Наманганда 8 ёшли бола юк машинаси уриши оқибатида ҳалок бўлди

Дастурга кўра, ЙТҲ вилоятнинг Уйчи тумани "Обжувоз" маҳалласида соат 12:30 лар атрофида юз берган. Мазкур маҳалланинг Диёр кўчаси бўйлаб ГАЗ-53 русумли юк машинасида ҳаракатланиб келаётган ҳайдовчи ўзидан олдинда ҳаракатланаётган 8 ёшли велосипедчини пайқамай қолиши оқибатида уни уриб юборган. 

Бунинг оқибатида бола бош мия ёпиқ шикастланиши ташхиси билан шифохонага ётқизилган. Бироқ унга кўрсатилган тиббий ёрдамга қарамасдан шифохонада вафот этган.  

"Ёш бола йўл четида велосипед ҳайдаб кетаётганини кўрдим. Аммо у бирдан катта йўлга чиқиб келишини ўйламагандим. Тормоз беришга улгурмадим. Барчадан йўл ҳаракати қоидаларига амал қилишни сўраб қолардим",  дейди ҳайдовчи.

"Gazeta.uz" нашрига кўра, юқоридаги ҳолат юзасидан ҳайдовчига нисбатан Жиноят кодексининг 266-моддаси 2-қисми (Одам ўлимига сабаб бўлган Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари давом этмоқда.  

Эслатиб ўтамиз, жорий йилнинг 5 октябрь куни Самарқанд вилояти Нарпай туманида ҳам "Damas" машинаси йўлда ҳаракатланиб кетаётганда йўлнинг белгиланмаган жойидан югуриб чиққан аёлни уриб юборганди. Оқибатда оғир тан жароҳатлари олган аёл туман шифохонасида вафот этган эди.