Ўзбекистонда таҳсил олаётган ҳиндистонлик талаба самолётдаги парвоз вақтида инсон ҳаётини сақлаб қолди

"Тошкентдан Деҳлига учаётганда самолётда «Агар бортда шифокор ёки тиббиёт ходими бўлса, илтимос, экипажга хабар беринг» деган эълон берилди. Шу пайт мен: «Ҳа, мен шифокорман, ёрдам бера оламан», дедим. Бемор 48 ёшли аёл эди, у жуда безовта эди, қаттиқ хавотирга тушган. Мен беморнинг ҳаётий кўрсаткичларини текширганимда юрак уриши тезлашгани, яъни тахикардия хуружи кечаётганини аниқладим. Дарҳол беморга каротин массажини қилишга киришдим ва тахминан 10-15 сониядан сўнг у ўзини яхшироқ ҳис қила бошлади. Самолёт Деҳлига қўнгач беморни шифокорларга топширдик", — дейди университет талабаси.

Эслатиб ўтамиз, аввалроқ бошқа бир Ҳиндистонлик талаба Ўзбекистондаги тиббиёт олийгоҳларида таълим сифати паст эканлиги ва ўқитувчилар инглиз тилида дарс ўта олмаётганлигини айтиб чиққан эди.

Жорий йилнинг 21 июль куни Ҳиндистон ҳукумати ўз фуқароларига Тошкент давлат тиббиёт университети Чирчиқ филиалида таълим олмаслик қатъий тавсия қилинган эди.

Маълум бўлишича, ушбу университетларда зарур академик ва клиник стандартлар йўқлиги, зарур инфратузилма йўқлиги, талабалардан ҳаддан ортиқ тўлов олиниши, ўқув шароити ва таълим сифати борасида ёлғон маълумотлар берилгани айтилган. Таъкидланишича, баъзи талабалар ўқишни тарк этмоқчи бўлганда, уларга босим ўтказилган.