Ўзбекистонда «яшил» энергия ҳажми 9 миллиард кВт·соатга етди

Таъкидланишича, бу кўрсаткич президент томонидан 2023 йил 20 сентябрда БМТ Бош Ассамблеясининг 78-сессиясида ҳамда 2025 йил 23 сентябр куни Нью-Йорк шаҳридаги БМТ Бош Ассамблеясининг 80-юбилей сессиясида белгилаб берилган стратегик вазифалар — иқтисодиётни иқлим ўзгаришларига мослаштириш, углерод нейтраллигига эришиш ва «яшил» энергетика улушини ошириш йўлидаги амалий натижалардан бири ҳисобланади.

Ҳозирда мамлакат бўйлаб умумий қуввати 4 682 мегаватт бўлган 12 та қуёш фотоэлектр станцияси ва 5 та шамол электр станцияси фаолият юритмоқда.

«Яшил» энергия ҳисобига:

• 2 млрд 730 млн куб метр табиий газ тежалди;
• атмосферага чиқиши мумкин бўлган 4 млн тонна зарарли моддаларнинг олди олинди.

Шунингдек, жорий йил бошидан 22 октябрь соати 19:00 ҳолатигача Ўзбекистондаги барча гидроэлектр, қуёш ва шамол станциялари жами 14 млрд 520 млн кВт·соат электр энергияси ишлаб чиқарди. Бу умумий генерациянинг 23 фоизи «яшил энергия» ҳиссасига тўғри келишини англатади.

Бошқача айтганда, бу миқдор 7,5 миллион хонадоннинг 10 ойлик ёки 6 миллион хонадоннинг бир йиллик электр эҳтиёжига тенгдир.

Маълумот учун, 23 сентябрь соати 14:00 ҳолатига кўра, қуёш ва шамол электр станциялари ишлаб чиқарган энергия ҳажми 8 миллиард кВт·соатни ташкил этган эди.