Пискент ва Бўка туманларидаги боғчаларда болалар заҳарланди

Ижтимоий тармоқларда Пискент ва Бўка туманларидаги айрим мактабгача таълим ташкилотларида тарбияланаётган болалар заҳарлангани акс этган видео тарқалди. Видеода заҳарланган болалар сони анча кўплиги ва шифохонага сиғмагани туфайли қўшни туманларга жўнатилгани акс этган.

Ўзбекистон

25.09.2025, 11:20

Lotinchada

Улашиш:

Piskent va Boʻka tumanlaridagi bogʻchalarda bolalar zaharlandi

Foto: Videodan kadr

Дастлабки тахминларга кўра, тарбияланувчилар 3,2 фоизли кефирдан заҳарланган. Ўрганишда ушбу маҳсулот Оққўрғон туманидаги цехларнинг бирида ишлаб чиқарилгани аниқланган. Ҳозирча нечта бола заҳарлангани очиқланмади. Тармоқларда тарқалган видеолавҳада вазият анча жиддийлигини кўриш мумкин.

Мактабгача ва мактаб таълими вазирлиги ҳолат юзасидан муносабат билдирди.

Маълум қилинишича, ҳолат 24-сентабр куни кузатилган: тарбияланувчилар саломатлигида ўзгариш бўлгани сабабли тиббиёт бирлашмаларининг юқумли касалликлар бўлимига мурожаат қилинган.

Дастлабки тиббий кўриклар хулосаси асосида бемор болаларга “ошқозон ичак фаолиятининг ўткир функционал бузилиши, овқат токсикинфексияси” ташхиси қўйилиб, зарурий муолажалар амалга оширилган. Шу куннинг ўзида аксарият болаларнинг соғлиғи яхшилангани туфайли уйларига жавоб бериб юборилган. Оғир аҳволдаги беморлар аниқланмаган.

Вазият Мактабгача ва мактаб таълими вазирлиги томонидан назоратга олинган. Санитария-эпидемиологик осойишталик ва жамоат саломатлиги қўмитаси ҳамда ҳуқуқни муҳофаза қилувчи органлар билан биргаликда ўрганиш ишлари бошланган.

“Тиббий ёрдамга мурожаат қилган беморлардан олинган таҳлиллар ҳамда истеъмол қилинган озиқ-овқатлар намуналари тегишли лабораторияларда текширувдан ўтказиляпти. Қайд этилган ҳолат юзасидан эпидемиологик суриштирув ишлари давом этяпти”, - дейилади муносабатда.

Вазирлик нечта бола заҳарланганини очиқламаган. Ҳолат юзасидан қўшимча маълумотлар берилиши маълум қилинган.

Ўзбекистон

25.09.2025, 11:20

Улашиш: