Трампнинг Лос-Анжелес ҳақидаги гапи танқидга учради

Трамп 5 октябрь куни Небраскадаги сайловолди митингида АҚШ ва Исроилнинг Эронга қарши урушида ғалаба қозониш учун америкаликлар айрим қурбонликларга тайёр бўлиши кераклигини айтди.

У эҳтимолий Эрон ҳужумида АҚШ шаҳарлари нишонга олиниши мумкинлигини назарда тутиб, Лос-Анжелес ва Сан-Диегога ҳужум қилиниши «жуда кичик нарх» эканини таъкидлади. Трамп уруш тез орада якунланишини ҳам айтди.

Калифорния губернатори, демократ Гэвин Ньюсом Трампнинг сўзларини кескин қоралади. У президент баёнотини «хавфли» деб атаб, Конгрессни Трампнинг ҳаракатларини чеклашга чақирди.

Трампнинг ўз партиясидаги айрим сиёсатчилар ҳам унинг фикридан узоқлашди. Сан-Диего яқинидан Вакиллар палатасига номзод бўлаётган республикачи Джим Десмонд АҚШнинг асосий вазифаси америкаликлар ва мамлакат ҳудудини ҳимоя қилиш эканини билдирди.

«Ҳеч бир Америка шаҳри қурбон қилиниши мумкин эмас ва ҳеч бир америкалик оила тасодифий зарар кўрмаслиги керак», — деб ёзди у.

Оқ уй эса Трампга нисбатан билдирилган танқидларни рад этди. Президент коммуникациялар бўйича директори Стивен Ченг Трамп АҚШ шаҳарлари ядровий қуролга эга Эрон томонидан таҳдид остида қолиши мумкинлигини назарда тутганини айтди.

АҚШда ноябрь ойида оралиқ сайловлар бўлиб ўтади. Вакиллар палатасининг барча 435 ўрни ҳамда Сенатдаги ўринларнинг учдан бир қисми учун сайлов ўтказилади. Сайлов натижалари Трамп президентлигининг иккинчи муддатидаги сўнгги икки йилига сезиларли таъсир кўрсатиши кутилмоқда.