Поезд устида селфи тушмоқчи бўлган мактаб ўқувчисини ток урди

Қайд этилишича, мазкур ҳолат вилоятнинг Боғдод туманида содир бўлган. 2011 йилда туғилган 7-синф ўқувчиси тумандаги темирйўл вокзалига ўзбошимчалик билан кириб, станцияда турган поезд вагонларига чиққан. Кейин ўзини селфи қилган. Бунинг оқибатида болани кучли электр токи урган. 

Мазкур воқеани Фарғона вилояти Транспортда хавфсизликни таъминлаш бошқармаси бошлиғи ўринбосари Музаффар Салимов ҳам тасдиқлаган.

"Навбатчилик қисми 61-сонли ўрта таълим мактабида ўқийдиган 7-синф ўқувчини тўк ургани ҳақида хабар келиб тушди. Ўрганишлар давомида ўқувчи вокзалнинг белгиланмаган жойидан ўтиб, темир йўл устида турган вагонга чиққани, сўнг телефонида ўзини селфи қилаётганда электр токи ургани аниқланди", дейди масъул.

Ток уриши оқибатида оғир тан жароҳати олган 7-синф ўқувчиси зудлик билан туман шифохонасига олиб борилган.

"Бемор касалхонага жуда оғир аҳволда олиб келинди. Дастлаб уни тиббий муолажа қилдик, кейин уни реанимация бўлимига олиб чиқдик. Боланинг танаси, юзи, бўйни, кўкраги, қорини, икки қўли, оёқ ва сон соҳаларининг 50 фоизи ток уриши ортидан куйган эди", дейди шифокор.

Бундан ташқари, у беморга иккинчи-учинчи даражали "а" куйиш, бош мия ёпиқ шикасти ҳамда мия чайқалиши ташхиси қўйилганлигини ҳам қўшимча қилиб, ҳозир унинг аҳволи яхшиланиб бораётганини ҳам айтган.