Нетаняху Озарбайжонга ташриф буюради. Алиев уни ҳибсга оладими?

Қайд этилишича, Нетанъяху ташрифи давомида Озарбайжоннинг Иброҳим келишувларига қўшилиши масаласи ҳам муҳокама қилинади. Бу келишувлар Исроил ва бир нечта араб давлатлари ўртасида дипломатик алоқаларни тиклашга қаратилган бўлиб, Боку ҳам ўз таъсирини Марказий Осиёда кучайтириш йўлида ушбу жараёнда иштирок этиши мумкин. Исроил Бош вазирининг Озарбайжонга қайси санада бориши ҳақида ҳали аниқ бир кун маълум қилинмади. 

Президент Илҳом Алиев яқинда Туркия Президенти Ражаб Тоиб Эрдўған ва Суриянинг янги президенти Муҳаммад ал-Шара билан музокаралар ўтказди. Бу эса уни минтақанинг етакчи дипломатик арбобларидан бири сифатида кўрсатмоқда. АҚШ ва Исроил расмийлари Алиевни муҳим минтақавий ўйинчилар ўртасидаги кўприк ролини ўйнай оладиган ноёб шахс сифатида баҳоламоқда. 

Илҳом Алиевнинг Бинямин Нетанъяхуни Озарбайжонда ҳибсга олиши эҳтимоли жуда паст. Озарбайжон ва Исроил ўртасидаги стратегик ҳамкорлик, айниқса мудофаа, энергетика ва хавфсизлик соҳаларида, тобора мустаҳкамланиб бормоқда. Озарбайжон Исроилнинг асосий қурол-яроғ импортчиларидан бири бўлиб, икки давлат ўртасидаги сиёсий алоқалар ҳам фаол ривожланмоқда.​ Агар Илҳом Алиев Нетанъяхуни ҳибсга олмаса Озарбайжоннинг Туркия билан илиқ муносабатларига путур етиши мумкин.   

Эслатиб ўтамиз, аввалроқ Исроил Бош вазири Бинямин Нетанъяху Гаагадаги Халқаро жиноий суди юрисдикциясини тан олган Венгрияга давлат ташрифи билан борган эди. Кейинчалик, Венгрия Бош вазири маъмурияти раҳбари Гергей Гуйяш Нетанъяху ташрифи доирасида Венгрия Халқаро жиноий суддан (ХЖС) чиқиши ҳақида огоҳлантирган эди.