ЖЧ–2026 финали АҚШ тарихидаги энг қиммат спорт мусобақасига айланди

19 июль куни АҚШнинг Нью-Жерси штати, Ист-Рутерфорд шаҳридаги “MetLife” стадионида бўлиб ўтадиган Аргентина – Испания учрашуви мамлакат тарихидаги энг қиммат спорт тадбири сифатида қайд этилмоқда.

TickPick билет платформаси маълумотларига кўра, финал учун қайта сотув бозоридаги чипталарнинг ўртача нархи 11 327 АҚШ долларини ташкил этган. Бу АҚШ спорти тарихидаги мутлақ рекорддир.

Таққослаш учун, аввалги рекорд Super Bowl LVIII финалига тегишли бўлиб, ўшанда чиптанинг ўртача нархи 9 411 доллар бўлган эди. Ҳозирги Жаҳон чемпионати финали эса мазкур кўрсаткичдан анча ўзиб кетди.

Бундан ҳам эътиборлиси, таққослаш вақтида TickPick платформасида сотувдаги энг арзон финал чиптаси 6 943 доллардан бошланган. Бу ҳам финалга бўлган талаб жуда юқори эканини кўрсатади.

Футболга қизиқиш ортмоқда

2026 йилги Жаҳон чемпионати тарихда илк бор 48 та миллий терма жамоа иштирокида АҚШ, Канада ва Мексика мезбонлигида ўтказилмоқда. Турнир давомида миллионлаб мухлислар учрашувларни бевосита стадионда томоша қилиш учун мазкур 3 мамлакатга ташриф буюрди.

Финалда амалдаги жаҳон чемпионлари Аргентина ҳамда Европанинг кучли термаларидан бири Испания ўзаро тўқнаш келиши нафақат спорт, балки тижорий жиҳатдан ҳам катта аҳамиятга эга воқеага айланди.

Билетларга бўлган катта талаб ва қайта сотув бозоридаги юқори нархлар футболнинг глобал миқёсдаги аудиторияси тобора кенгайиб бораётганини яна бир бор исботлади.

Бу финал жаҳон футболи тарихидаги энг йирик тижорий ҳодисалардан бири сифатида ёдда қолиши мумкин.