JCH–2026 finali AQSh tarixidagi eng qimmat sport musobaqasiga aylandi

19-iyul kuni AQSHning Nyu-Jersi shtati, Ist-Ruterford shahridagi “MetLife” stadionida bo‘lib o‘tadigan Argentina – Ispaniya uchrashuvi mamlakat tarixidagi eng qimmat sport tadbiri sifatida qayd etilmoqda. 

TickPick bilet platformasi ma’lumotlariga ko‘ra, final uchun qayta sotuv bozoridagi chiptalarning o‘rtacha narxi 11 327 AQSH dollarini tashkil etgan. Bu AQSH sporti tarixidagi mutlaq rekorddir.

Taqqoslash uchun, avvalgi rekord Super Bowl LVIII finaliga tegishli bo‘lib, o‘shanda chiptaning o‘rtacha narxi 9 411 dollar bo‘lgan edi. Hozirgi Jahon chempionati finali esa mazkur ko‘rsatkichdan ancha o‘zib ketdi. 

Bundan ham e’tiborlisi, taqqoslash vaqtida TickPick platformasida sotuvdagi eng arzon final chiptasi 6 943 dollardan boshlangan. Bu ham finalga bo‘lgan talab juda yuqori ekanini ko‘rsatadi. 

Futbolga qiziqish ortmoqda

2026-yilgi Jahon chempionati tarixda ilk bor 48 ta milliy terma jamoa ishtirokida AQSH, Kanada va Meksika mezbonligida o‘tkazilmoqda. Turnir davomida millionlab muxlislar uchrashuvlarni bevosita stadionda tomosha qilish uchun mazkur 3 mamlakatga tashrif buyurdi.

Finalda amaldagi jahon chempioni Argentina hamda Yevropaning kuchli termalaridan biri Ispaniya o‘zaro to‘qnash kelishi nafaqat sport, balki tijoriy jihatdan ham katta ahamiyatga ega voqeaga aylandi. 

Biletlarga bo‘lgan katta talab va qayta sotuv bozoridagi yuqori narxlar futbolning global miqyosdagi auditoriyasi tobora kengayib borayotganini yana bir bor isbotladi.

Mutaxassislarning fikricha, bu final jahon futboli tarixidagi eng yirik tijoriy hodisalardan biri sifatida yodda qolishi mumkin.