Ўзбекистонда икки вазирлик бирлаштирилди

Ўзбекистонда Мактабгача ва мактаб таълими вазирлиги ҳамда Олий таълим, фан ва инновациялар вазирлиги негизида янги Таълим ва фан вазирлиги ташкил этилди.

Тегишли фармонни Президент Шавкат Мирзиёев имзолади.

Ислоҳотдан кўзланган асосий мақсад таълим, тарбия ва илм-фаннинг ягона тизимини шакллантиришдан иборат. Янги вазирлик таълим муассасалари фаолиятини ташкил этиш, соҳадаги талабларни белгилаш, шунингдек, аккредитация ва лицензиялаш масалаларига масъул бўлади.

Ягона бошқарув тизими таълимнинг турли босқичлари ўртасидаги узвийликни таъминлаш, таълим сифати ва самарадорлигини оширишга қаратилган.

Ислоҳот доирасида олий таълим соҳасида давлат аралашувини камайтириш, олий таълим муассасаларининг мустақиллигини кенгайтириш ва нодавлат таълим секторини ривожлантириш учун шароит яратиш ҳам кўзда тутилган.

Вазирликларнинг бирлаштирилиши муносабати билан Олий таълим, фан ва инновациялар вазири Қўнғиротбой Шарипов ҳамда Мактабгача ва мактаб таълими вазири Эъзозхон Каримова лавозимидан озод этилди.