Тошкентда хавфли вирус тарқалдими?

Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабековага кўра, ҳаво-томчи йўли орқали юқадиган респиратор касалликлар мавсумий феъл-атворга эга. Куз-қиш даврида уларнинг кўтарилиши кузатилади ва бундан хавотирга тушиш керак эмас.

"Бир неча ҳафта олдин юртимизда ҳаво ҳарорати кескин пасайди. Шу сабабли кўпчилик хонадонлар иссиқликни мўътадил сақлаб туриш учун эшик-деразалар, тирқишларни зичлаб ёпади. Оқибатда хонадонлар ва ёпиқ бино-иншоотларда ҳаво алмашинуви камайиши ҳисобига атмосферада вируслар концентрацияси ошиши кузатилди. 

Одатда ўткир респиратор касалликлар бир неча клиник белгилар билан намоён бўлади. Дастлаб бурун шиллиқ қаватида қичишиш, кейинчалик ҳид билиш қобилияти қисман пасайиши, аксириш, бурун оқиши кузатилади", дейди Отабеков.  

Бундан ташқари, у айрим инсонларнинг томоғида ачишиш, қуриш, оғриқ, овоз бўғилиши ва қуруқ йўтал пайдо бўлиши мумкинлигини айтиб, касалликдан тузалиш босқичида балғам кўчиши, хасталикнинг юмшаши, йўтал чоғида оғриқлар пасайиши сингари ҳолатлар юз беришини ҳам таъкидлаган.

"Бу каби патологияларни келтириб чиқарадиган омиллар кўп. Грипп вируси, парагрипп, риновирус, аденовирус, коронавирус шулар жумласидандир. Янги вируслар пайдо бўлди, деган хабарларга келсак, мана, ҳозиргача дунёда коронавируснинг 45 мингга яқин мутациялари юзага келди ва ҳамон бу жараён тўхтагани йўқ. Бироқ ўтган даврда улардан фақат 10-15 таси касаллик чақирди, холос. Шу маънода, мутациялардан ваҳима ясаш керак эмас, дейди ССВ мутахассиси.

Нурмат Отабековага кўра, ҳозир кузатилаётган ўткир респиратор вирусли инфекциялар авж олиш жараёнини  табиий ҳолат, деб қабул қилиш зарур.

"Бугунги кунда мамлакатимиз ҳудудида тиббиёт учун нотаниш ва номаълум бўлган вируслар айланиб юриши қайд этилгани йўқ. Балки аниқланаётган касалликларнинг аксарияти мавсумий респиратор хасталиклардир. 

Буни олдини олиш ва эпидемиологик вазият барқарорлигини таъминлаш учун беморлар жамоат жойларига чиқишдан, одамлар билан мулоқотдан имкон қадар ўзларини чеклашлари, ижтимоий масофа сақлашлари, айниқса беморлар ва уларнинг парвариши билан шуғулланаётган шахслар тиббий ниқобда бўлишлари тавсия этилади", дея хулоса қилган у.