Ўзбекистон Ҳиндистондан ҳайвонлар ва чорвачилик маҳсулотлари импортини вақтинча чеклади

 Бу ҳақда республика Бош давлат ветеринария инспектори қарори қабул қилинди.

Қарорга мувофиқ, Ҳиндистоннинг бутун ҳудудидан тирик ҳайвонлар ва паррандалар импорти, шунингдек, Ғарбий Бенгалия штатидан барча турдаги чорвачилик маҳсулотларини олиб кириш тақиқланди. Чекловлар 29 январдан кучга кирган.

Ҳимоя чоралари Бутунжаҳон ҳайвонлар соғлиғини сақлаш ташкилоти (WOAH) маълумотлари ҳамда Ҳиндистондаги мураккаб эпидемиологик вазият ҳақидаги расмий хабарлар асосида жорий этилди. Шу билан бирга, Ғарбий Бенгалия штатидан ветеринария назорати остидаги товарларни халқаро транзит орқали ташишга рухсат этилган.

Вилоятлар ва чегара пунктларидаги ҳудудий ветеринария инспекторларига чекловлар ижроси устидан қатъий назорат ўрнатиш, шунингдек, тадбиркорлар ўртасида тушунтириш ишларини олиб бориш вазифаси юклатилди. Айни пайтда, ветеринария хизмати Ҳиндистоннинг эпизоотик жиҳатдан хавфсиз ҳудудларидан маҳсулот импортини алоҳида тартибда кўриб чиқиш ҳуқуқини сақлаб қолади.

Маълумот учун, Нипах вируси зооноз инфекция ҳисобланиб, ҳайвонлар ва одамларда оғир касалликларга сабаб бўлиши мумкин. Вақтинчалик чеклов мазкур патогеннинг Ўзбекистон ҳудудига кириб келиши ва тарқалишининг олдини олишга қаратилган.

Жаҳон соғлиқни сақлаш ташкилоти эса Nipah вируси ҳали тўлиқ ўрганилмагани сабабли унинг янада тарқалиш эҳтимолини истисно этмаяпти ва ҳукуматларни аҳолини хавф омиллари ҳақида хабардор қилишни кучайтиришга чақирмоқда.