Toshkentda xavfli virus tarqaldimi?

Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Otabekovaga koʻra, havo-tomchi yoʻli orqali yuqadigan respirator kasalliklar mavsumiy feʼl-atvorga ega. Kuz-qish davrida ularning koʻtarilishi kuzatiladi va bundan xavotirga tushish kerak emas.

"Bir necha hafta oldin yurtimizda havo harorati keskin pasaydi. Shu sababli koʻpchilik xonadonlar issiqlikni moʻʼtadil saqlab turish uchun eshik-derazalar, tirqishlarni zichlab yopadi. Oqibatda xonadonlar va yopiq bino-inshootlarda havo almashinuvi kamayishi hisobiga atmosferada viruslar konsentratsiyasi oshishi kuzatildi. 

Odatda oʻtkir respirator kasalliklar bir necha klinik belgilar bilan namoyon boʻladi. Dastlab burun shilliq qavatida qichishish, keyinchalik hid bilish qobiliyati qisman pasayishi, aksirish, burun oqishi kuzatiladi", deydi Otabekov.  

Bundan tashqari, u ayrim insonlarning tomogʻida achishish, qurish, ogʻriq, ovoz boʻgʻilishi va quruq yoʻtal paydo boʻlishi mumkinligini aytib, kasallikdan tuzalish bosqichida balgʻam koʻchishi, xastalikning yumshashi, yoʻtal chogʻida ogʻriqlar pasayishi singari holatlar yuz berishini ham taʼkidlagan.

"Bu kabi patologiyalarni keltirib chiqaradigan omillar koʻp. Gripp virusi, paragripp, rinovirus, adenovirus, koronavirus shular jumlasidandir. Yangi viruslar paydo boʻldi, degan xabarlarga kelsak, mana, hozirgacha dunyoda koronavirusning 45 mingga yaqin mutatsiyalari yuzaga keldi va hamon bu jarayon toʻxtagani yoʻq. Biroq oʻtgan davrda ulardan faqat 10-15 tasi kasallik chaqirdi, xolos. Shu maʼnoda, mutatsiyalardan vahima yasash kerak emas, deydi SSV mutaxassisi.

Nurmat Otabekovaga koʻra, hozir kuzatilayotgan oʻtkir respirator virusli infeksiyalar avj olish jarayonini  tabiiy holat, deb qabul qilish zarur.

"Bugungi kunda mamlakatimiz hududida tibbiyot uchun notanish va nomaʼlum boʻlgan viruslar aylanib yurishi qayd etilgani yoʻq. Balki aniqlanayotgan kasalliklarning aksariyati mavsumiy respirator xastaliklardir. 

Buni oldini olish va epidemiologik vaziyat barqarorligini taʼminlash uchun bemorlar jamoat joylariga chiqishdan, odamlar bilan muloqotdan imkon qadar oʻzlarini cheklashlari, ijtimoiy masofa saqlashlari, ayniqsa bemorlar va ularning parvarishi bilan shugʻullanayotgan shaxslar tibbiy niqobda boʻlishlari tavsiya etiladi", deya xulosa qilgan u.