Трамп Ғазодаги келишувнинг иккинчи босқичи бошланганини маълум қилди

Трамп Truth Social ижтимоий тармоғида: “Иккинчи босқич ҳозир бошланди”, — деб ёзди ва бу жараённи “муҳим босқич” деб атади.

Унинг таъкидлашича, ҲАМАС томонидан ушлаб турилган 20 нафар тирик гаровдаги шахс озод этилган, уларнинг аҳволи яхши. Шу билан бирга, ҳали қурбонлар жасадлари қайтарилмаганини айтиб, иш ҳали тугамаганини билдирди.

АҚШ раҳбарига кўра, ҲАМАС “қўлдаги қуролларни топширишга рози бўлган”. Трамп бу ҳақда шундай деди:

“Улар қуролни ташлаймиз, деб айтди. Агар ташламаса, биз уларни қуролсизлантирамиз. Қандай қилиб эканини тушунтиришим шарт эмас, лекин шундай бўлади".

Шунингдек, Трамп Мисрнинг Шарм-аш-Шайх шаҳрида бўлиб ўтган саммитда ҳам бу ҳақда тўхталиб, келишув босқичлари ўзаро боғлиқ эканини ва “иккинчи босқич аллақачон бошланганини” таъкидлади.

Унинг сўзларига кўра, АҚШ ҲАМАС билан Яқин Шарқ бўйича махсус вакили Стив Уиткофф орқали мулоқот олиб борган ва қуролсизлантириш масаласи муҳокама қилинган.

Трамп, шунингдек, баъзи хабарларга кўра ҲАМАС Ғазодаги айрим жиноий гуруҳларни йўқ қилгани ҳақидаги маълумотларга изоҳ бериб:

“Бу мени безовта қилмайди. Улар бошида бир нечта ёмон гуруҳларни тугатишлари керак эди — улар шундай қилишди. Бу мен учун муаммо эмас,” — деди.