Ўзбекистон ва Туркия президентлари қатор келишувларни имзолади

2026 йил 29 октабр куни Анқарада Ўзбекистон Президенти Шавкат Мирзиёев ва Туркия Президенти Режеп Таййип Эрдоған музокаралар якунида икки томонлама ҳамкорликни ривожлантиришга қаратилган ҳужжатларни имзолашди. Келишувлар савдо-иқтисодий алоқаларни кенгайтириш, тадбиркорларни қўллаб-қувватлаш ва фуқароларнинг ижтимоий ҳуқуқларини ҳимоя қилишни назарда тутади.

Имзоланган ҳужжатлар орасида бизнесни қўллаб-қувватлаш бўйича юқори даражадаги кенгашни таъсис этиш тўғрисидаги битим бор. Ушбу келишув икки мамлакат ишбилармон доиралари ўртасидаги ҳамкорликни ривожлантириш ва тадбиркорлар учун қулай шароитлар яратишга қаратилган.

Шунингдек, имтиёзли савдо битими доирасида товарлар рўйхатини кенгайтириш тўғрисидаги баённома имзоланди. Ҳужжат икки мамлакат маҳсулотларининг ўзаро бозорларга кириш имкониятларини кенгайтиришни кўзда тутади.

Томонлар ижтимоий таъминот тўғрисидаги ҳукуматлараро битим ва уни амалга ошириш бўйича маъмурий битимни ҳам имзолашди. Ушбу ҳужжатлар икки давлат фуқароларининг ижтимоий ҳуқуқларини самарали ҳимоя қилишга қаратилган.

Бундан ташқари, 2022 йил 29 мартда имзоланган, давлат чегаралари орқали товарлар ва транспорт воситаларининг ўтиши ҳақида олдиндан ахборот алмашишни назарда тутувчи баённомага ўзгартириш киритиш бўйича қўшимча баённома имзоланди.

Ўзбекистон Президенти матбуот хизматининг маълум қилишича, келишувлар икки мамлакат ўртасидаги савдо-иқтисодий ҳамкорликни янада кенгайтириш ва узоқ муддатли шерикликни мустаҳкамлашга хизмат қилади.