Ўсимликлар карантини агентлигида миллиардлаб сўмлик коррупцион схема фош этилди

Тергов материалларига кўра, фуқаро Г.У. агентликда ишловчи танишлари орқали Туркиянинг «Y.T.» корхонасини хорижий экспортёрлар реестрига киритиб бериш эвазига 1 000 АҚШ долларини олган вақтида ашёвий далиллар билан ушланган.

Шунингдек, дастлабки текширувда Г.У. агентликнинг бош мутахассиси М.Г. билан тил бириктириб, Россиядан ёғоч ҳамда Туркманистондан помидор маҳсулотларини импорт қилиш учун карантин рухсатномасини расмийлаштириб бериш эвазига 2,9 миллион сўм олгани аниқланган.

Тергов давомида Г.У.га тегишли икки банк пластик картаси орқали фуқаролардан 10,9 миллиард сўм маблағ P2P ўтказмалари кўринишида келиб тушгани маълум бўлди. Ушбу маблағнинг 1,6 миллиард сўми турли тўловларга сарфланган, 6,1 миллиард сўми нақдлаштирилган, қолган 3,1 миллиард сўми эса шахсий эҳтиёжларга ишлатилгани қайд этилмоқда.

Бундан ташқари, агентлик ва унинг қуйи ташкилотлари ғазна ҳисобрақамларига келиб тушган 91,7 миллиард сўм тўлов таҳлил қилинганда, 14,9 миллиард сўми 759 нафар фуқаронинг пластик карталари орқали амалга оширилгани аниқланган. Уларнинг 174 нафари агентлик тизими ходимлари, яна 34 нафари эса уларнинг яқин қариндошлари экани маълум қилинди.

Мазкур ҳолатлар юзасидан тегишли моддалар билан жиноят иши қўзғатилган бўлиб, ҳозирда тергов ҳаракатлари давом этмоқда.