Бухорода саксовул ўғрилари 500 млн сўмдан зиёд жаримага тортилди

Унда айтилишича, айни кунларда ҳам Бухоро вилояти Экология, атроф-муҳитни муҳофаза қилиш ва иқлим ўзгариши бошқармаси инспекторлари томонидан саксовул ўсимликлари кесилишининг олдини олиш мақсадида рейд тадбирлари олиб борилмоқда. 

Мазкур рейдлар давомида 9 ойда жами 60 та ҳуқуқбузарлик ҳолати аниқланган. Шундан 2 нафар фуқарога такроран ҳуқуқбузарлик содир этганлиги учун Ўзбекистон Республикаси Маъмурий жавобгарлик тўғрисидаги кодекси (МЖтК)нинг 79-моддаси 2-қисми билан баённома расмийлаштирилиб, ҳужжатлар судга тақдим этилган ҳамда суд қарори бўйича жавобгарликка тортилган. 

Ҳуқуқбузарликлар юзасидан фуқароларга нисбатан МЖтКнинг 79-моддаси 1-қисми билан баённома расмийлаштирилиб, 164 миллион 900 минг сўм жарима ҳамда табиатга етказилган 373 миллион 727 минг сўм зарар ҳисобланилган. 

"Саксовулларни синдирган ҳуқуқбузарлар жами 538 миллион 627 минг сўм тўлашлари белгиланди. Рейд тадбирлари давом этади", дейилади хабарда. 

Эслатиб ўтамиз, бундан олдин Ўзбекистоннинг турли ҳудудларидан табиатга зарар етказиб, ноқонуний равишда қум-шағал аралашмасини қазиб олган бир гуруҳ фуқаролар қўлга тушгани ҳақида хабар берган эдик.