Ўзбекистон Грузия ва Ироқдан ёқилғи импорт қилмоқда

Президентга “Ўзбекнефтгаз” акциядорлик жамиятининг жорий йил биринчи ярмидаги фаолияти ва йил якунига қадар устувор вазифалари юзасидан ҳисобот берилди.

Жорий йилнинг биринчи ярмида жамият томонидан 11,5 миллиард куб метр табиий газ қазиб чиқарилди. Айни пайтда нефть, дизель ёнилғиси, авиакеросин ва суюлтирилган газ ишлаб чиқариш ҳажми прогноз кўрсаткичларидан юқори бўлди.

Йил якунига қадар:

• 1 миллион 100 минг тонна автобензин;
• 983 минг тонна дизель ёнилғиси;
• 310 минг тонна авиакеросин;
• 606 минг тонна суюлтирилган газ;
• қарийб 1 миллион 180 минг тонна синтетик маҳсулот ишлаб чиқариш кўзда тутилган.

Дунёдаги геосиёсий вазият кескинлашиши натижасида Марказий Осиё йўналишида авиақатновлар сони ортиб бормоқда. Жумладан, Ўзбекистонга амалга оширилаётган рейслар сони 2025-йилга нисбатан кўпайган.

Жорий йил июль–декабрь ойларида авиакеросинга бўлган талаб 375 минг тоннани ташкил этиши, яъни ўтган йилнинг мос даврига нисбатан 27 фоизга ўсиши кутилмоқда. Унинг асосий қисми маҳаллий нефтни қайта ишлаш заводлари ҳисобидан қопланади.

Шу билан бирга, айрим ҳамкор мамлакатларда нефть маҳсулотлари экспортига чекловлар жорий этилгани сабабли муқобил манбалардан, жумладан, Грузия, Ироқ ва бошқа давлатлардан авиакеросин импорт қилиш йўлга қўйилди.