“Soliq Mobile” орқали 3,2 млрд сўм кешбек талон-торож қилинди

Бош прокуратура ҳузуридаги Департаментнинг Фарғона вилояти бошқармаси томонидан терговга қадар текширув ўтказилди.

Натижада фуқаролар М.Х., М.Х. ва К.И. ўзаро тил бириктириб, Telegram тармоғидаги гуруҳлар орқали 7 та МЧЖга тегишли харид чекларини ноқонуний сотиш билан шуғуллангани аниқланди.

Улар амалда ҳеч қандай молиявий алоқалар бўлмаган бўлса-да, гўёки 3,3 трлн сўмлик маҳсулот ва хизматлар харид қилинганлиги ҳақида сохта электрон ҳисоб-фактуралар расмийлаштириб, пулларни онлайн-NKM орқали кирим қилишган ва харид чеклари чиқаришган.

Натижада “Soliq Mobile” иловаси орқали 211 584 нафар фуқарога кешбек сифатида 28,5 млрд сўм ҳисобланиб, шундан 3,2 млрд сўми тўлаб берилиши орқали бюджет маблағлари талон-торож қилинган.

Ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.