Навоийда 34,8 млрд сўмлик кешбек фирибгарлиги фош этилди

Навоий шаҳрида 34,8 млрд сўмлик маблағлар “кешбек” сифатида ҳисобланиб ўзлаштириб юборилганлиги фош этилди.  

Бош прокуратура ҳузуридаги Департаментнинг Навоий шаҳри бўлими ўтказган терговга қадар текширувда 13 та МЧЖнинг масъул шахслари ва бошқаларнинг ўзаро тил бириктиргани аниқланди.

Улар 4,5 трлн сўмлик маҳсулот етказиб берилгани ҳақида сохта электрон ҳисоб-фактураларни расмийлаштирган. Шунингдек, савдодан тушган пулларни назорат-касса машиналари орқали гўёки кирим қилиб, фуқароларга маҳсулот сотилгандек харид чекларини расмийлаштирган.

Натижада 105 524 нафар фуқаронинг номига “Soliq Mobile” иловаси орқали 34,8 млрд сўм кешбек ҳисобланган.

Ушбу маблағлар қонунга хилоф равишда ўзлаштирилган.

Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.