Тошкент метросида йўловчиларга хизмат кўрсатиш сифати оширилади

Ўзбекистон Республикаси Президентининг “Тошкент метрополитени фаолиятининг самарадорлигини оширишга доир қўшимча чора-тадбирлар тўғрисида”ги қарори қабул қилинди.

2030 йилгача метро йўналишлари кенгаяди

Қарорга мувофиқ, 2030 йилгача:

— метронинг кунлик йўловчилар сони 1,8 миллион нафарга етказилади;
— метро бекатлари сони 79 тагача оширилади;
— линиялар умумий узунлиги 103 километрга етказилади;
— поездлар ҳаракат интервали 2-3 дақиқагача қисқартирилади.

Метро бекатларида янги хизматлар пайдо бўлади

2028 йил якунига қадар метро бекатларида йўловчилар учун қатор қулайликлар яратилади.

Жумладан:

🔹 бекатлар кириш қисми ва ўтиш йўлакларида вендинг аппаратлари ҳамда кичик савдо объектлари жойлаштирилади;

🔹 метро станциялари олдида “Park & Ride” тизими жорий этилади;

🔹 автотураргоҳдан фойдаланган йўловчиларга метро чипталари учун чегирмалар берилади;

🔹 автотураргоҳ тўловини метро чиптаси орқали қоплаш механизми ишлаб чиқилади.

Тадбиркорларга метро ҳудудида фаолият юритишга рухсат берилади

Шунингдек, хусусий тадбиркорларга метро тоннеллари ва бекатларида аукцион орқали ижара асосида хавфсиз фаолият турлари билан шуғулланиш имконияти яратилади.