Endi Qashqadaryoda oʻquvchi oʻqituvchisi tomonidan kaltaklandi

Qayd etilishicha, voqea kecha, 9 oktabr kuni soat 10:30 lar atrofida kuzatilgan. 33-maktabning ingliz tili fani oʻqituvchisi U.S. (ayol kishi) 5-"B" sinf oʻquvchisi M.P.ga darsda maktabdagi boshqa oʻquvchilarga hurmatsizlik qilma deb, ogohlantirish bergan. 

Soʻng oʻquvchi oʻqituvchini haqoratlagan. Oʻquvchining bu hurmatsizligi uchun oʻqituvchi uni maktabning maʼnaviyat xonasiga olib borishga uringanda qoʻli bolaning burniga tegib ketishi oqibatida burun sohasidan qon kelgan. 

Shundan keyin oʻquvchi onasini maktabga olib kelgan. Ona esa bolasiga shikast yetkazgan, ingliz tili oʻqituvchisi bilan janjallashgan. Ona va oʻqituvchi oʻrtasidagi janjalni kuzatgan maktab direktori huquq-tartibot organlariga murojaat qilib, ularni chaqirgan.

"Hozirda holat Shahrisabz tuman Ichki ishlar boshqarmasi masʼullari ishtirokida oʻrganilmoqda. Bundan tashqari, Qashqadaryo viloyati Maktabgacha va maktab taʼlimi boshqarmasi boshligʻi topshirigʻiga asosan masʼul xodimlar oʻquvchi holidan xabar oldi. Oʻrganishlar yakuni yuzasidan qoʻshimcha axborot beriladi", deyiladi boshqarma izohida.

Bundan oldin ham joriy yilning 23 sentabr kuni Toshkent shahar Chilonzor tumanida joylashgan 188-sonli umumtaʼlim maktabida ham 6-sinf oʻquvchisi rus tili darsida oʻqituvchisiga gap qaytarib, u bilan tortishib qolgan edi. Shunda oʻqituvchi oʻquvchining qulogʻidan choʻzib, oʻtirgan partasidan tortib olib chiqqan hamda yuziga tarsaki urgan edi. Bu holat ijtimoiy tarmoqlarda katta muhokamalarga sabab boʻlgan. Hatto Rossiya amaldorlari ham mazkur voqeaga Oʻzbekiston hukumatidan izoh soʻragan.